काठमाडौं – सरकाका प्रवक्ता, सञ्चार तथा सूचना प्रविधिमन्त्री गोकुल बास्कोटाले मन्त्रिमण्डल हेरफेर गर्ने कुरा प्रधानमन्त्रीको नितान्त व्यक्तिगत मामिला भएकाले मन्त्रिपरिषद् बैठकमा त्यसको छलफल हुन आवश्यक नभएको प्रतिक्रिया दिएका छन् ।

मंगलवार बिहान आकस्मिक रूपमा डाकिएको मन्त्रिपरिषद् बैठक सकिएपछि सञ्चारकर्मीलाई प्रतिक्रिया दिँदै बास्कोटाले मन्त्रिमण्डल हेरफेर गर्ने भनेर बैठक नबोलाइएको प्रष्ट पारेका हुन् ।

मन्त्रिमण्डल हेरफेर गर्ने विषय बैठकको एजेण्डा नै नभएको बास्कोटाले बताए । ‘मन्त्रिमण्डल हेरफेर गर्ने कुरा प्रधानमन्त्रीको नितान्त व्यक्तिगत विषय हो,’ बास्कोटाले भने, ‘यसलाई क्याबिनेटमा छलफल गर्नैपर्दैन ।’

बिहान ७ बजे बोलाइएको मन्त्रिपरिषद्को ‘आकस्मिक’ बैठक करीब १० बजेतिर सकिएको थियो । बास्कोटाका अनुसार बैठकमा सरकारका पछिल्ला गतिविधि र केही विवादित विधेयकबारे छलफल भएको थियो ।

यसअघि सामान्यतया मन्त्रिपरिषद्को बैठक सोमवार र बिहीवार बस्ने गरेको थियो । मंगलवार बिहान ७ बजे नै खाना खाने गरी बोलाइएको बैठकले कुनै आकस्मिक निर्णय गर्ने हो कि भन्ने हल्ला राजनीतिक वृत्तमा देखिएको भएतापनि त्यस्तो केही नभएको सरकारका प्रवक्ता गोकुल बास्कोटाले जानकारी दिए । 

‘यो सोमवारकै बैठकको निरन्तरता हो,’ बैठकपछि पत्रकारसँग कुरा गर्दै बास्कोटाले भने, ‘यसलाई आकस्मिक बैठक भन्न पनि मिल्दैन । बैठक बिहान साँझ जतिबेला पनि बस्न सक्छ ।’

बैठक बसिरहेको बेलामा उद्योग, वाणिज्य तथा आपूर्तिमन्त्री मातृका यादव बैठक छोडेर बाहिरिएपछि विभिन्न आशंका पैदा भएको थियो । सीमा नाकामा भारतबाट आउने तरकारीमा विषादी परीक्षण गर्ने निर्णय सरकारले फिर्ता लिएपछि सरकारको चौतर्फी आलोचना भइरहेको छ । मन्त्री यादवले आफूलाई सचिवहरूले डुबाएको प्रतिक्रिया दिएका थिए । 

सत्तारूढ दल नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ समेतले संसदले बजेट पास गरेपछि मन्त्रिमण्डल हेरफेर हुनसक्ने आशयका अभिव्यक्तिहरू दिँदै आएका थिए । सोमबार बजेट पारित भएको भोलिपल्ट मंगलवार प्रधानमन्त्री ओलीले ‘आकस्मिक’ बैठक बोलाएपछि मन्त्रिमण्डल हेरफेर गर्ने विषयमा छलफल हुनसक्ने आशंका राजनीतिक वृत्तमा फैलिएको थियो ।