काठमाडौं – अमेरिकाको एक राजमार्गमा अचानक डलरको वर्षा भयो र चारैतिर नोट उड्न थाल्यो । 

अनि त राजमार्गमा गुडिरहेका गाडी रोकेर मानिसहरू दुवै हातले डलर सोहोर्न थाले । अर्काले भन्दा बढी डलर हात पार्न उनीहरू प्रतिस्पर्धा गर्न थाले ।

नर्थ एट्लान्टाको इन्टरस्टेट हाईवे नम्बर २८५ मा नोटहरू राखिएको एउटा ट्रक गुडिरहेको थियो । ट्रकको ढोका अलिकति खुल्यो अनि राजमार्गमा नोट बर्सिन थाल्यो । 

त्यसपछि त डलर लिनका लागि मानिसहरू तँछाडमछाड गर्न थाले । ट्रक कम्पनीले आफ्नो एक लाख ७५ हजार डलरका नोट लुटिएको अनुमान गरेको छ । 

राजमार्ग हुँदै गइरहेका केही मानिसले नोट बर्सिएको र लुटपाट मच्चिएको भिडियो समेत खिचेका छन् । भिडियो सामाजिक सञ्जालमा भाइरल भइरहेको छ । 

Police Urge Motorists to Turn in Cash After Armored Truck Spills $175,000 Across Atlanta Highway - 7/10/19. . pic.twitter.com/TPU1Kxazqe

— Lloyd Legalist (@LloydLegalist) July 11, 2019

घटना मंगलवार रातिको हो । घटनाको खबर पाएपछि प्रहरी घटनास्थलमा पुग्यो तर उसकै अगाडि पनि मानिसहरूले डलर लुटिरहे । 

प्रहरीले मानिसहरूलाई डलर फर्काउन आग्रह गरेको भए पनि जम्मा ६ जना मानिसले ४४ सय डलर फर्काए । डलर नफर्काउने मानिसहरूलाई कारवाही गर्ने चेतावनी प्रहरीले दिएको छ ।

एजेन्सी