अस्पतालको इमर्जेन्सी भरीभराउ, शव राख्ने ‘ब्ल्याक जोन’ बन्यो बिरामीको शय्या

असार २७, २०७६

जनकपुरधाम – जनकपुर अञ्चल अस्पतालको आकस्मिक उपचार (इमर्जेन्सी) कक्षा भरीभराउ भएको छ ।

उपचारका लागि राखिएका शय्या भरीभराउ हुँदा बिरामीलाई शव राख्ने ‘ब्ल्याक जोन’ क्षेत्रमा राखेर उपचार भइरहेको छ ।


ADVERTISEMENT

जनकपुर अञ्चल अस्पतालको आकस्मिक कक्षका इन्चार्ज मोहम्मद अनवर अलिका अनुसार उपचारका क्रममा मृत्यु भएको अवस्थामा बिरामीको शवलाई भुइँमा राख्न छुट्याइएको स्थानलाई ‘ब्ल्याक जोन’ भनेर किटान गरिएको हो तर इमर्जेन्सीमा ठाउँ नभएपछि अहिले त्यही शव राख्ने ठाउँमा बिरामीलाई राखिएको छ । बिरामीका आफन्तले घरबाटै ल्याएको ओछ्यानमा राखेर बिरामीको उपचार भइरहेको छ ।

महोत्तरीको पिपरा गाउँपालिकाको रतौलीको रहिमनपुर टोलकी सविया खातुनलाई झाडापखाला लागेको भएपनि उनी भूइँमै उपचार गराउन बाध्य भएकी छन् । ‘ब्ल्याक जोन’को अगाडि भूइँमा आफ्नो ओछ्यानमा पल्टेर उपचार गराइरहेकी छन् । उनलाई झाडापखाला लागेका कारण ‘स्लाइन’ चढाएको छ । उनले १ वर्षे बालकलाई आफूसँगै सुताएकी छन् ।

‘अस्पतालमा रहेको आकस्मिक कक्षमा रहेको बेड खाली नभएका कारण भूइँमै बस्न भनियो,’ बिरामी सबियाका पति नरोद्दीन अन्सारीले भने, ‘त्यसमा पनि हिजैदेखि पानी परिरहेको कारण झन् सास्ती भोग्नुपरेको छ ।’

उनी नजिकै धनुषाको कजरा रमौलका ५५ वर्षीय रामउदित यादव पनि भूइँमै पल्टेर उपचार गराउन बाध्य छन् । पेट दुखेपछि बिहीवार नै अस्पतालको आकस्मिक कक्षमा भर्ना भएका यादवलाई शुक्रवारदेखि भूइँमै बस्न भनिएको छ । ‘ब्ल्याक जोन भएको ठाउँमा भूइँमै बस्नुस् भनेर अस्पतालका स्वास्थ्यकर्मीले भनेकाले शुक्रवार बिहानदेखि भूइँमा बसिरहेका छौं,’ बिरामी यादवका ज्वाइँ महादेव यादवले भने ।

भूइँमै राखेर उपचार गराउँदा रोगको थप संक्रमण हुने जोखिम भएपनि अस्पतालले ध्यान दिएको छैन । अस्पतालको आकस्मिक कक्षका इन्चार्ज अलिले बिरामीलाई रोगको थप संक्रमण हुन सक्ने कुरा स्वीकार गरे ।

‘तर के गर्ने ? अस्पतालको आकस्मिक कक्षमा रोगीको चाप बढी छ, बेडको अभाव भएपछि अस्पतालबाट अन्यत्र बाहिर जानुस् भनेर पनि त भन्न सकिँदैन,’ अलिले भने,’ आकस्मिक कक्षमा ८ वटा अवलोकन बेड छ, त्यसलाई थपेर १० वटा बेड बनाइएको छ ।’ बाँकी ७ वटा स्ट्रेचर बेड पनि भरिएकाले समस्या भएको उनले बताए । बिरामीलाई यताउता लैजाने ह्वील चेयर सहितको स्ट्रेचर बेडमा पनि बिरामीलाई राख्नुपरेको छ । 

सर्जिकल वार्डदेखि अन्य वार्ड समेतमा बेड खाली नभएकाले भूइँमा राखेर उपचार गर्नुपरेको उनले बताए । अस्पताल परिसर अविरल वर्षाले जलमग्न छ ।

असार २७, २०७६ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस