काठमाडौं – ठगीको एक मामिलामा बलिउड अभिनेत्री सोनाक्षी सिन्हा कानूनी झमेलामा परेकी छन् । 

सोनाक्षीविरुद्ध उत्तर प्रदेशको मुरादाबाद प्रहरी चौकीमा धारा ४२० अन्तर्गत ठगीको उजुरी दर्ता भएको छ । बिहीवार सोधपुछका लागि मुरादाबाद प्रहरी सोनाक्षीको मुम्बईस्थित घर पुगेको थियो तर उनी घरमा फेला नपरेपछि रित्तै फर्केको थियो । 

सन् २०१८ मा सोनाक्षीले स्टेज पर्फर्मेन्सका लागि २४ लाख भारु लिएको तर कार्यक्रममा पर्फर्म नगरेको आरोप लगाएर कटघरका प्रमोद शर्माले सोनाक्षीविरुद्ध ठगीको उजुरी दर्ता गरेका थिए । 

मुम्बईको जुहुस्थित घरमा प्रहरीले सोनाक्षीको घन्टौं प्रतीक्षा गरे पनि उनी उपलब्ध भइनन् । शनिवार सोनाक्षीसँग सोधपुछ गर्न फेरि प्रहरी उनको घर जाने बताइएको छ ।

सोनाक्षीका पीएले भने सोनाक्षीले कसैलाई पनि धोका नदिएको र नौ वर्षको करीयरमा इमान्दारीका साथ काम गरेको भन्दै बयान दिएका छन् । सोनाक्षीको टवि बिगार्नलाई यो उजुरी दर्ता गरिएको उनको आरोप छ ।

एजेन्सी