काठमाडौं – आईसीसी विश्वकपको फाइनल आइतवार लन्डनको ऐतिहासिक लर्ड्स मैदानमा खेलिनेछ । क्रिकेटको जनक इंग्ल्यान्ड र सधैंको अन्डरडग न्युजील्यान्डबीच भिडन्त हुँदैछ । आजको खेलबाट क्रिकेटले नयाँ विश्वविजेता पाउनेछ । 

इयोन मोर्गनको कप्तानीमा रहेको इंग्ल्यान्डले पाँचपटकको च्याम्पियन अस्ट्रेलियालाई सेमीफाइनलमा हराएर विश्वकपको फाइनल पुगेको हो । न्युजील्यान्डले चाहिँ दुईपटकको च्याम्पियन भारतलाई सेमीफाइलमा हराएको थियो । 

इंग्ल्यान्डले विश्वकप पाँचौंपटक आयोजना गरेको हो र ऊ चौथोपटक फाइनल पुगेको हो । सन् १९७९, १९८७ र १९९२ मा ऊ फाइनलमा पुगेर हारेको थियो । अब उससँग २७ वर्षपछि फाइनल जित्ने अवसर छ । 

इंग्ल्यान्डको ब्याटिङको कुरा गर्दा जो रूटले यस प्रतियोगिताका १० खेलमा ५४९ रन बनाएका छन् । तिनमा दुई शतक र तीन अर्धशतक छन् । 

जोनी बेयरस्टोले १० खेलमा ४९६ रन बनाएका छन् । उनले दुई शतक र दुई अर्धशतक बनाइसकेका छन् । जेसन रोय, बेन स्टोक्स र कप्तान इयोन मोर्गनले पनि राम्रो रन बनाएका छन् । 

न्युजील्यान्ड चाहिँ भाग्यले सेमीफाइनल पुगेको हो । लीग चरणमा पाकिस्तान र उसको बराबरी अंक भए पनि राम्रो रनरेटका आधारमा न्युजील्यान्ड सेमीफाइल पुगेको थियो । तर सेमीफाइनलमा उसले भारतलाई हरायो र लगातार दोस्रोपटक फाइनल पुग्यो । 

टीमको सबभन्दा ठूलो शक्ति कप्तान केन विलियम्सन हुन् । उनले नौ खेलको आठ पारीमा ५४८ रन बनाएका छन् । त्यसमा दुई शतक र दुई अर्धशतक छन् । 

रोस टेलरले आठ पारीमा ३३५ रन बनाएका छन् ।

न्युजील्यान्डका ६ खेलाडीले अघिल्लो संस्करणको फाइनल खेलेका थिए । 

उसका बलरहरू लोकी फर्ग्युसन, ट्रेन्ट बोल्ट र म्याट हेनरी जस्ता तीव्र गतिका बलर छन् र उनीहरूले म्याचको दिशा परिवर्तन गर्ने क्षमता राख्छन् । सेमीफाइनलमा न्युजील्यान्डलाई बलरले नै जिताएका हुन् । 

फर्ग्युसनले १८ विकेट लिएका छन् भने बोल्टको नाममा १७ विकेट छ । हेनरीले १३ अनि नीशमले १२ विकेट लिएका छन् । मिशेल स्यान्टनरले ६ विकेट हात पारेका छन् ।

इंग्ल्यान्डका बलरको कुरा गर्दा जोफ्रा आर्चरले यस विश्वकपमा १९ विकेट लिएका छन् । अनि मार्क वूडले १७, क्रिस भोक्सले १३ र आदिल राशिदले ११ विकेट लिएका छन् । प्लंकेटले आठ विकेट हात पारेका छन् ।

अघिल्लो विश्वकपमा न्युजील्यान्डले फाइनलमा निकै फितलो प्रदर्शन गरेको थियो । तर आजको फाइनलमा उसले इंग्ल्यान्डलाई कडा चुनौती दिने अपेक्षा छ ।

एजेन्सी