काठमाडौं–भेनेजुएलाका राष्ट्रपति निकोलस मादुरोका छोरा निकोलस अर्नेस्टो मादुरो गुयरा ‘गुपचुप’ काठमाडौंमा छन् । त्यहाँको राजनीति र सत्ता सञ्चालनमा शक्तिशाली उनले साथमा तीन जना मन्त्री पनि ल्याएका छन् । 
शनिबार काठमाडौं आइपुगेको उनीहरुको टोलीमा ११ जना छन् । 

चार दिन नेपाल बस्दा निकोलस अनेस्टोले कम्युनिष्ट नेताहरुसँग भेटघाट गर्नेछन् । त्यसक्रममा आइतबार उनले नेकपा नेता वामदेव गौतम र नारायणकाजी श्रेष्ठलाई भेटिसकेका छन् । सत्तारुढ दल नेकपाको युवा संगठनको निम्तोमा उक्त टोली काठमाडौं आएको हो । 

भ्रमणमा आउँदा राष्ट्रपतिका छोरा, मन्त्री र टोलीका अन्य सदस्यले आवतजावत गर्ने साधारण कक्ष प्रयोग गरी त्रिभुवन अन्तर्राष्ट्रिय विमानस्थलबाट काठमाडौं प्रवेश गरेका थिए। नेपालका लागि भेनेजुएलाका आवासीय राजदूत कोरोमोतो गेदाई क्लाल्डरनले मात्र भीआईपी कक्ष प्रयोग गरेका थिए। अन्न्पूर्ण पोस्टमा खबर छापिएको छ।  

नेपाल आएका राष्ट्रपतिका छोरासहितको टोलीको भेटलाई ‘गोप्य’ बनाउनकै लागि प्रधानमन्त्रीलगायत मन्त्रीहरूसँगको भेटलाई भने कार्यसूचीमा राखिएको छैन।