काठमाडौँ - प्रमुख प्रतिपक्षी दल नेपाली कांग्रेसले बाढी, पहिरो र डुवान प्रभावितहरुका लागि राहत स्वरुप नेपाली संघीय संसदमा प्रतिनिधित्व गर्ने सांसदहरूको ५ दिनको तलब बराबरको रकम सहयोग घोषणा गरेको छ । कांग्रेस संसदीय दलका प्रमुख सचेतक बालकृष्ण खाणले सोमवार एक विज्ञप्ति जारी गर्दै सरकारले संसदमा बाढी पहिरो पीडितका विषयमा छलफल छलफल नगरेको आरोप लगाएका हुन् ।

'संसदको धारणा सुनेर सरकारले प्रतिबद्धता व्यक्त गरी विपदका बेला सबै शक्ति एकजुट भई विपदको सामना गर्न, जनतालाई विश्वास र भरोषा दिलाउँन, विपदबाट उद्धार, राहत र पुनर्स्थापनामा जुट्नुपर्नेमा सरकार संसदको सामना गर्न नै तयार नहुनु दुःखद कुरा हो,' विज्ञप्तिमा उल्लेख छ, 'नेपाली कांग्रेसका संघीय संसदमा प्रतिनिधित्व गर्ने सदस्यहरूले ५ दिन बराबरको तलब रकम सहयोग गर्ने घोषणा गर्दछौं ।'

सरकार पीडितप्रति संवेदनशील नदेखिएको आरोप लगाउँदै खाणले विज्ञप्तिमार्फत सरकारको यस्तो असंवेदनशिल, अनुत्तरदायी र असहिष्णुता कार्य प्रति खेद गरेका छन् ।

विज्ञप्तिमार्फत कांग्रेस संसदीय दलले सर्लाही जिल्लामा भएको विभिन्न हिंसात्मक घटनामा सरकारले विधिको शासन पद्धतिको अपहेलना र मानवअधिकारको उल्लङ्घन साथै नागरिक अधिकार एवं नागरिकको बाँच्न पाउने हकको रक्षा नगरेको आरोप लगाएको छ ।

'नेपाली कांग्रेस र राष्ट्रिय जनता पार्टीले संघीय संसदमा संसदीय छानविन समिति बनाउन माग गर्दा सत्तापक्षले यस्तो महत्वपूर्ण र संवेदनशील विषयमा गम्भीर भई छानविन समिति बनाउन तयार नभएको हुँदा मानव अधिकार, नागरिक अधिकार र जनसरोकारसँग सम्बन्धित गम्भीर विषयका माग पुरा गराउन संसद अवरोध गर्नु परिरहेको छ,' विज्ञप्तिमा उल्लेख गरिएको छ ।