काठमाडौं– बीपी कोइराला स्वास्थ्य विज्ञान प्रतिष्ठान धरानका तत्कालीन उपकुलपति बलभद्रप्रसाद दास (बीपी दास) समेत ८ जनाविरुद्ध अख्तियार दुरूपयोग अनुसन्धान आयोगले भ्रष्टाचार मुद्दा दायर गरेको छ। उपकुलपति दास तथा नेतृत्व तहका अन्य कर्मचारीहरूको संलग्नतामा विभिन्न उपकरण (वस्तु) तथा सेवा खरिदमा अनियमितता गरेको ठहर गर्दै विशेष अदालतमा सोमवार मुद्दा दायर गरिएको हो ।

प्रतिष्ठानका पदाधिकारी तथा कर्मचारीहरूले प्रचलित ऐन-नियम विपरीत बदनियतपूर्वक गैरकानूनी रूपमा आर्थिक लाभ लिई सप्लायर्स तथा आफूलाई फाइदा र प्रतिष्ठानलाई हानी नोक्सानी पुर्‍याई भ्रष्टाचार गरेको पुष्टि हुन आएको अख्तियारको  जिकिर छ ।

तत्कालीन उपकुलपति बलभद्र प्रसाद दास (विपि दास) ले चार करोड आठ लाख अन्ठानब्बे हजार उन्नाइस रुपैयाँ, तत्कालीन अस्पतालका निर्देशक अरविन्द कुमार सिन्हाले तीन करोड पचहत्तर लाख तीस हजार छ सय उन्नाइस रुपैयाँ, तत्कालीन रजिष्टार नन्दकुमार थापाले एक करोड छयानब्बे लाख नौ हजार आठ सय असी रुपैयाँ र रजिष्टार तुलबहादुर श्रेष्ठले छपन्न लाख सतहत्तर हजार चार सय पाँच रूपैयाँ अस्वाभाविक रूपमा बढी मूल्य तिरी खरिद गर्ने गराउने कार्य गरी प्रतिष्ठानलाई नोक्सानी पुर्‍याएको ठहर अख्तियारले गरेको छ ।

सोही बराबरको विगो कायम गरी उनीहरूविरुद्ध भ्रष्टाचार निवारण ऐन, २०५९ को दफा ८ को उपदफा (१) र दफा ८ को उपदफा (१) को देहाय (ञ) बमोजिम मुद्दा दायर गरिएको छ ।

यसैगरी लेखा प्रमुख प्रमुख दिनेश राज दाहाल दुई करोड चौँतीस लाख एकासी हजार आठ सय उन्नाइस रुपैयाँ, डेपुटी मेनेजर अमित श्रीवास्तवले एक करोड चौहत्तर लाख सोह्र हजार दुई सय रुपैयाँ बढी मूल्य तिरी खरिद गर्ने गराउने कार्यमा संलग्न रहेको जिकिर गरी सोही बराबर विगो तोकिएको छ ।

उपकरण सप्लार्य प्रोसिजन मेडिकल प्रा.लि./वायोमेड इन्टरनेसनल प्रा.लि. का प्रोपराइटर चेतन अग्रवाल र उपकरण सप्लायर्स सर्जिकेम डिस्टिव्युटर्सका प्रोपराइटर उमेश अग्रवालले विभिन्न सामानहरू आपूर्ति गर्दा प्रतिष्ठानका पदाधिकारीसँग मिलेमतो गरी  चेतन अग्रवालले एक करोड चार लाख सोह्र हजार सात सय सन्तानब्बे र उमेश अग्रवालले साठी लाख छत्तीस हजार तीन सय त्रिचालीस हिनामिना तथा भ्रष्टाचार गरेको ठहर अख्तियारको छ ।