काठमाडौं – चीनको हाङ्चोमा बुधवार शीशाको ढोका खुस्किएपछि छोरीलाई चोट लाग्ने अवस्था आएकाले आमाले जोगाएकी छन् र त्यसक्रममा गम्भीर घाइते भएकी छन् । 

याङ थर भएकी ३१ वर्षीया महिला प्रिन्ट गर्ने पसलमा हुँदा अगाडिको ढोकाको कब्जा फुस्किएको थियो । महिलाकी छोरी बाहिर उभिरहेकी थिइन् र शीशा उनीमाथि खस्ने स्थिति थियो । 

घटनाको भिडियोमा यी बहादुर महिलाले आठ वर्षीया छोरीलाई जोगाउन ढोकाको ह्यान्डल कसेर समातेको देखिन्छ । छोरी चाहिँ भाग्न सफल हुन्छिन् । तर ढोका अति नै भारी भएकाले सडकपेटीमा बजारिन्छ अनि याङ पनि पछारिन्छिन् । 

उनी फुटेको शीशाको ढोकासँगै लड्छिन् र उनको बेस्सरी रगत बग्छ । 

भाग्यवश उनकी छोरी र नजिकै रहेका अन्य दुई बालबालिका घाइते हुँदैनन् । 

याङलाई अनुहारमा गम्भीर चोटपटक लागेको छ । उनको नाक भाँचिएको छ र शीशाका टुक्रा भित्रैसम्म गडेका छन् । उनलाई हान्चो अस्पताल लगिएको थियो । 

उनकी छोरी चिन्तित भएर अस्पतालको इमर्जेन्सी वार्डबाहिर कुरेको देखिन्छ ।

दुई मिटर अग्लो ढोका अर्का ग्राहकले निकै कसेर धकेल्दा खुकुलो भएको पसले पेङले बताइन् । 

ढोका पाँच वर्षअघि हालिएको र मर्मतका लागि नजाँचिएको उनको भनाइ छ, उनले थपिन् ।

याङलाई थप उपचारका लागि प्लास्टिक सर्जरी अस्पताल लगिएको छ र उनी एकदेखि दुई महिनामा पूरै ठीक हुने बताइएको छ ।

एजेन्सी