काठमाडौं– नेकपाका महत्त्वपूर्ण विभागहरूको कार्य विभाजन र जिल्ला इञ्चार्ज एवं सह–इञ्चार्जहरूको टुङ्गो लागाउने प्रक्रिया शुरू भएसँगै पार्टीमा पूर्व एमाले र पूर्व माओवादी नेताले विभिन्न गुट–उपगुट सञ्चालन गरेको टिप्पणी भैरहेका छन् ।

संगठन, विदेश, नीति तथा अनुसन्धान, स्कूल लगायतका विभागको नेतृत्वको जिम्मेवारी कसले पाउने भन्ने बहससँगै पार्टीभित्र गुट–उपगुटको चर्चा चुलिएको हो ।

यसबीचमा नेकपाको सचिवालय बैठकले ७७ जिल्ला र जिल्ला कमिटी सरह नै मान्यता प्राप्त ६ महानगरपालिकामा इञ्चार्ज र सह–इञ्चार्जको टुङ्गो लगाइसकेको छ । तर महत्त्वपूर्ण मानिएका विभागहरूको नेतृत्वको बारेमा अनौपचारिक सहमति जुटेपनि त्यसलाई सार्वजनिक गरिएको छैन ।

पार्टीका विभाग र जिल्ला इञ्चार्ज एवं सह–इञ्चार्जहरूको टुङ्गो लगाउने प्रक्रिया शुरू भएसँगै पूर्व एमालेका नेताहरू केपी ओली, माधव नेपाल र वामदेव गौतमले पार्टीमा गुट चलाएको टिप्पणी भैरहेपनि वास्तविकता भने फरक पाइएको छ । 

गएको नवौं महाअधिवेशनपछि तत्कालीन एमालेमा मुख्यतः दुईवटा गुट मात्र देखा परे । पूर्व नेकपा (एमाले)भित्र केपी ओलीको नेतृत्वमा एउटा गुट सञ्चालन भयो भने माधव नेपालको नेतृत्वमा अर्को गुट ।

कतिपयले वामवदेले पनि पार्टीमा गुट चलाएको आरोप लगाए । तर गौतम स्वयंले भने गुट बनाएनन् । 

‘गुटका हिसाबले पूर्व एमालेभित्र ओली र नेपाल गुट मात्र छन् । अरू कुनै नेताले गुट बनाएको देखिएको छैन,’ पूर्व एमालेका एक नेताले लोकान्तरसँग भने । 

पार्टीमा गुट नचलाएपनि पूर्व एमालेका नेतामध्ये वामदेव गौतमलाई ओली र नेपाल गुटभित्र रहेका धेरै नेताहरूको दह्रो समर्थन देखिन्छ ।

वामदेवका पक्षमा केपी ओली गुटभित्र रहेका १३ जना र माधव गुटभित्र रहेका ७ जना गरी २० जना जिल्ला इञ्चार्ज छन् ।

ओली र नेपाल दुवै गुटका गरी २१ जना सह–इञ्चार्ज गौतमका पक्षमा छन् । पूर्व एमालेका तर्फबाट जिल्ला इञ्चार्ज बनेका ४५ मध्ये २० जना वामदेवका पक्षमा छन् भने माधव नेपालको पक्षमा १४ र ओलीको पक्षमा ११ जना छन् । ओली र नेपालको पक्षमा जम्मा २५ जना छन् । तर गौतम एक्लैको पक्षमा २० जना इञ्चार्ज छन् । 

‘यसबाट के देखिन्छ भने अहिलेका जिल्ला र महानगरपालिकाका इञ्चार्जहरूको गणना गर्दा वामदेव पक्ष नै शक्तिशाली देखिन्छ,’ पूर्व एमालेका एक प्रभावशाली नेताले लोकान्तरसँग भने । 

तत्कालीन नेकपा एमालेको नवौं महाअधिवेशनमा अध्यक्षका उम्मेदवार केपी ओलीलाई जिताउन वामदेवले निर्णायक भूमिका खेलेका थिए । त्यस्तै २०७० सालमा सम्पन्न दोस्रो संविधानसभा निर्वाचनपछि केपी ओलीलाई एमाले संसदीय दलको नेता बनाउन पनि वामदेवले नै निर्णयक भूमिका खेलेका थिए । 

२०७४ सालमा सम्पन्न प्रतिनिधिसभा र प्रदेशसभा निर्वाचनअघि तत्कालीन नेकपा एमाले र तत्कालीन माओवादी केन्द्रबीच चुनावी तालमेल र गठबन्धन निर्माणमा पनि गौतमले पार्टीभित्र महत्त्वपूर्ण जिम्मेवारी निभाएको धेरैले चर्चा गर्छन् । 

२०७४ को चुनावअघि नेपाली कांग्रेससँग मिलेर तत्कालीन माओवादीले सरकार चलाइरहेको थियो । तत्कालीन माओवादीको कांग्रेससँगको सहकार्य टुटाएर उसलाई  एमालेसँगको चुनावी गठबन्धनमा सामेल गराउनमा गौतमले महत्त्वपूर्ण भूमिका खेलेको भन्दै पुष्पकमल दाहाल प्रचण्ड लगायत पार्टीका शीर्ष नेताले सार्वजनिक कार्यक्रममै गौतको प्रसंसा गरेका थिए ।

साथै चुनावअघि वामपन्थी गठबन्धनको संयुक्त चुनावी घोषणापत्र निर्माणको संयोजकको जिम्मा पनि गौतमले पाएका थिए । उनैको नेतृत्वमा बनेको चुनावी घोषणापत्रको सर्वत्र चर्चा भएको थियो । ओली नेतृत्वको वर्तमान सरकारले पनि सोही घोषणापत्र पछ्याउँदै बजेट, नीति तथा कार्यक्रम ल्याउन प्रयास गरेको टिप्पणी हुने गरेको छ ।