काठमाडौं– नेत्रविक्रम चन्द विप्लव नेतृत्वको नेकपाका सर्लाही जिल्ला इन्चार्ज कुमार पौडेलको हत्या छानबिनका लागि संसदीय छानबिन समितिको माग गर्दै प्रतिनिधिसभाको बैठक अवरुद्ध गर्दै आएको प्रमुख प्रतिपक्षी दल नेपाली कांग्रेस सदन सञ्चालनमा सहमत भएको छ । 

सभामुख कृष्णबहादुर महराको पहलमा सभामुखको कार्यकक्ष सिंहदरबारमा बुधवार भएको छलफलमा संसद बैठक सञ्चालनका लागि सहमति भएको हो । सहमतिअनुसार प्रमुख प्रतिपक्षी नेपाली कांग्रेस र प्रतिपक्षी दल राजपाले बाढी, पहिरो, डुबान लगायतका बारेमा जरूरी सार्वजनिक महत्वको प्रस्ताव पेश गर्ने र सदन सुचारू गर्ने महराका प्रेस सल्लाहकार डिल्ली मल्लले जानकारी दिए । 

छलफलमा प्रमुख प्रतिपक्षी नेपाली कांग्रेसका प्रमुख सचेतक बालकृष्ण खाँडसहित पुष्पा भुसाल, मिनेन्द्र रिजाल र दिलेन्द्र बडु, पार्वती डिसी चौधरी, सत्ता पक्षका तर्फबाट नेकपा संसदीय दलका उपनेता सुवास नेम्वाङ, प्रमुख सचेतक देव गरूङ, राजपा अध्यक्ष मण्डलका संयोजक राजकिशोर यादव र लक्ष्मणलाल कर्ण लगायतको उपस्थिति रहेको थियो । 

बुधवार १ बजे राखिएको प्रतिनिधिसभाको बैठक दिउँसो साढे २ बजेका लागि सारिएको छ । यसअघि असार ३० गते कांग्रेस र राजपाले सदनमा बाढी पहिरो र डुबान पीडितको उद्धार राहातमा ध्यान केन्द्रीत गर्न भन्दै जरुरी सार्वजनिक महत्वको प्रस्तावसहित संसदमा स्थगन प्रस्ताव लगेको थियो । 

स्थगन प्रस्तावमा छलफल नगराइ सूचना मार्फत संसदको बैठक स्थगित गरेको भन्दै कांग्रेसले महराको आलोचना गरेको थियो । संसदमा धेरै विजनेश अलपत्र परेको भन्दै सदन सुचारु गर्न सभामुखले गरेको आग्रह अनुसार सदन सुचारु गर्न कांग्रेस राजी भएको हो । संसदीय छानबिन समिति गठनको प्रस्तावबारे अहिले दिउँसो १ बजे बस्ने कार्यव्यवस्था समिति बैठकमा छलफल हुने राजपाका एक नेताले बताए ।