काठमाडौं- सिंगापुरमा जारी आईसीसी टी-ट्वान्टी विश्वकप छनोट अन्तर्गतको एसिया फाइनलको तेस्रो खेलमा कुवेतमाथि नेपालले शानदार जीत हात पारेको छ । 

इन्डियन एसोसियसन क्रिकेट मैदानमा शनिवार भएको खेलमा नेपालले कुवेतलाई ७ विकेटले पराजित गरेको हो ।

कुवेतले दिएको कुवेतले दिएको १४२ रनको लक्ष्य नेपालले १५ ओभर ५ बलमा मात्र ३ विकेट गुमाएर भेट्टायो । 

नेपालका लागि कप्तान पारस खड्काले अर्धशतक बनाए । ओपनिङमा आएका पारसले ६८ रन बनाए । त्यसक्रममा उनले ११ चौका र १ छक्का प्रहार गरे । 

शरद भेषवाकरले नटआउट ३८ रनको योगदान गर्दा उपकप्तान ज्ञानेन्द्र मल्लले १९ रन जोडे । 

दिपेन्द्र सिंह ऐरी १ रनमै पेभेलियन फर्के भने रोहित कुमार पौडेलले नटआउट ६ रन बनाए ।

बलिङतर्फ कुवेतका मुहमद कासिफले ३ विकेट लिए ।

यसअघि टस हारेर पहिले ब्याटिङ गरेको कुवेतले निर्धारित २० ओभरमा ९ विकेटको क्षतिमा १४१ रन बनाएको थियो ।

कुवेतका लागि कप्तान मुहमद कासिफले नटआउट ४९ रन बनाए । त्यस्तै आदनन इद्रेसले २५ तथा मोहमद आस्लमले २३ रन जोडे । 

कुवेतलाई मध्यम स्कोरमै रोक्न सन्दीप लामिछाने र बसन्त रेग्मीले समान ३/३ विकेट लिए ।

कुवेतलाई हराउँदै नेपालले ग्लोबल छनोटमा पुग्ने सम्भावना कायमै राखेको छ । नेपालले अब आइतवार आयोजक सिंगापुरसँग खेल्नेछ । सिंगापुरसँग नेपाले पराजय नभोगे नेपाल शीर्ष स्थानमा रहँदै ग्लोबल छनोटमा पुग्नेछ ।