बनेपा – जिल्लाको धनेश्वर महादेव प्राथमिक विद्यालय सञ्चालनका लागि आयोजना गरिएको महायज्ञबाट २० लाख रुपैयाँ नगद संकलन भएको महायज्ञ सञ्चालन समितिले जनाएको छ ।

साउन २० गतेदेखि शुरू भएर मंगलवार समापन भएको ‘स्वर्णिम श्रीमद्भागवत भक्ति सत्संग महायज्ञ’मा नगद २० लाख रुपैयाँ संकलन भएको र साट्न बाँकी चेक ८ लाख रुपैयाँ जति रहेको विद्यालय व्यवस्थापन समितिका अध्यक्ष तथा महायज्ञ मूल समारोह समितिका संयोजक अनिरुद्ध थापाले बताए ।

‘विद्यालय सञ्चालनमा सहयोग पुर्‍याउने उद्देश्यले आयोजना गरिएको महायज्ञमा नगद रकमका साथै सहयोगी दाताहरूले बालुवा, सिमेन्ट, रोडा र ढुंगा आवश्यकताअनुसार उपलब्ध गराउने भन्ने प्रतिबद्धता व्यक्त गर्नुभएको छ,’ उनले भने, ‘विद्यालय परिसरमा विद्यार्थीलाई खेल्नको लागि भलिबल र ब्याडमिन्टन खेल मैदानलगायत बालबगैंचा बनाउने सोच बनाएको छु ।’

पशुपति अन्नपूर्ण आश्रमका अन्तर्राष्ट्रिय समितिका अध्यक्ष डा. जगदीश वैद्यले विद्यालय सञ्चालन गर्नका लागि उपलब्ध गराउने भनेर प्रतिबद्धता जनाएको २७ लाख रुपैयाँ भने प्राप्त गर्न बाँकी रहेको विद्यालय व्यवस्थापन समितिका अध्यक्षसमेत रहेका थापाले बताए ।

महायज्ञ सञ्चालन गर्न सबै गरी करीब ८ लाख ५० हजार रुपैयाँ खर्च भएको उनले बताए । स्वर्णिम श्रीमदभागवत भक्ति सत्संग महायज्ञमा कथा नारीविदुषी सुश्री अनुराधा शास्त्रीजी र देशव्यापी १०८ श्रीमद्भागवत सत्संकल्प अभियानकर्ता मुमुक्षु श्री उद्धव शर्माले कथावाचन गरेका थिए ।

विक्रम संवत् २०३८ मा स्थापना भएको सो विद्यालय २०७२ को भूकम्पपछि करीब बन्दजस्तै अवस्थामा पुगेको थियो । ४ शिक्षक दरबन्दी रहेको सो विद्यालयमा विद्यार्थी संख्या घट्दै गएपछि विक्रम संवत् २०७४ साउनबाट पूर्णरुपमा बन्द नै भएकोमा २०७६ वैशाखबाट पुनः सञ्चालनमा ल्याएर अहिले कक्षा नर्सरीदेखि २ कक्षासम्म सञ्चालन भइरहेको सो विद्यालयलाई आर्थिक सहयोगका लागि महायज्ञ सञ्चालन गरेको विद्यालयले जनाएको छ ।

१ दरबन्दी र ३ निजी स्रोतमा गरी ४ शिक्षकले अंग्रेजी माध्यमबाट पठनपाठन गर्दै आइरहेको सो विद्यालयमा अहिले ४३ विद्यार्थी अध्ययन गरिरहेका छन् ।