बुटवल – सत्तारुढ दल नेकपाका प्रमुख सचेत भूमिश्वर ढकालको घरमा भएको बम विस्फोटमा नेत्रविक्रम चन्द ‘विप्लव’ नेतृत्वको नेकपाका संलग्नता रहेको हुनसक्ने प्रहरीले आशंका गरेको छ ।

घटनामा संलग्नलाई हालसम्म पक्राउ गर्न नसकिएको इलाका प्रहरी कार्यालय बुटवलका प्रमुख भीमलाल भट्टराईले लोकान्तरलाई जानकारी दिए ।

‘देशका विभिन्न ठाउँका घटनामा संलग्नका आधारमा विप्लव नेतृत्वको समूहले आक्रमण गरेको हाम्रो ठम्याइँ छ,’ उनले भने ।

सैनामैना–८ रामापुर कलौनीमा रहेको उनको घरमा पत्नी, बाबा–आमालगायत छन् । ढकाल सुत्ने कोठासम्मै बम प्रहार भएको तर त्यो विस्फोट नहुँदा मानवीय क्षति जोगिन पुगेको छ । गाडीमा भने पछाडिको भाग जलेर क्षतिग्रस्त भएको छ ।

साथीको जन्मदिनलाई शुभकामना दिने भन्दै जाग्राम बसेकी पल्लो घरकी १ जना किशोरी सरू आचार्य र साबित्रा पोखरेलले ड्याम्म गरेको आवाज सुनेपछि चिच्याएर गुहार मागेका थिए ।

राति २ बजेको समयमा मोटरसाइकलमा चढेर आएका ३ जनाले बम हानेर भागेका थिए । छिमेकीहरू जुटेर लगत्तै आगो निभाएका थिए । जिल्ला प्रहरी कार्यालयका प्रमुख एसपी हृदय थापा सहितको प्रहरीको टोलीले घटनास्थल पुगेर निरीक्षण गरेको थियो । त्यसक्रममा पेट्रोल र मट्टितेल भरिएका बम फालिएका र विस्फोट नभएको अवस्थामा फेला परेका थिए ।

ढकालकी धर्मपत्नी निर्मला ढकालले राति घर अगाडि बाइक आएपछि शंका लागेको बताइन् । त्यसबेला चोर आयो कि भन्दै शंका लागेको उनले बताइन् ।

मुख्यमन्त्री र सभामुखद्वारा निरीक्षण

घटनापछि प्रदेश ५ सरकारका मुख्यमन्त्री शंकर पोखरेल, सभामुख पूर्णबहादुर घर्ती, आन्तरिक मामिला तथा कानूनमन्त्री कूलप्रसाद केसीले घटनास्थलमा पुगेर निरीक्षण गरेका छन् । त्यसक्रममा मुख्यमन्त्रीले घटनाको सूक्ष्म अध्ययन गर्न प्रहरी प्रशासनलाई आग्रह गरे ।  

छानबिनका लागि कुनै कसर बाँकी नराख्ने भन्दै पोखरेलले परिवारजनको सुरक्षाका लागि सुरक्षाकर्मी परिचालन गर्न सकिने बताए । आन्तरिक मामिला तथा कानूनमन्त्री कुलप्रसाद केसीले घटनामा संलग्नको खोजबिन गरेर कानूनी दायरामा ल्याइने बताए । यस्ता अपराधपूर्ण कार्य सह्य नहुने उनको भनाइ थियो । सांसदले सुरक्षाको प्रत्याभूति बनाउन जरुरी रहेको बताए ।