काठमाडौँ-दुई दिने  माक्सवाद र एशियाली दर्शन विषयक अन्तर्राष्ट्रिय सम्मेलनमा १० देशका ३०० भन्दा बढीले सहभागिता जनाउने भएका छन् । नेपाल संस्कृत विश्वविद्यालय, नेपाल खुला विश्वविद्यालय र माक्सीय गुरुकुलको आयोजनामा भदौ २ र ३ गते राजधानीमा सम्मेलन आयोजना हुँदैछ । 

सम्मेलनमा नेपाल, चीन, भारत, अमेरिका, बेलायत, थाइल्याण्ड, दक्षिण कोरियालगायत देशका प्रतिनिधिको सहभागिता हुने आयोजक समितिका सदस्य सचिव डा प्रेमराज न्यौपानेले जानकारी दिए ।

सम्मेलनमा पूर्वीय सोच र  माक्सवाद, कर्मकाण्डमा  माक्सवाद, वेदान्त र  माक्सवाद, बौद्ध दर्शन र  माक्सवादी दर्शन, सङ्ख्य दर्शन र  माक्सवाद,  माक्सवाद र एशियाली दर्शनको अध्ययन पद्धति, कला साहित्यलाई हेर्ने  माक्सवादी दृष्टिकोण,  माक्सवाद र नेपाली साहित्य, माक्सवाद र बुद्ध दर्शनका समदृष्टिकोण, दर्शन विश्वदर्शन,  माक्सवाद र एशिया अनुभव, वैदिक साहित्यमा  माक्सवादी धारणालगायत २८ विषयका कार्यपत्र सम्बन्धित क्षेत्रका विज्ञले प्रस्तुत गर्नेछन् । 

सम्मेलनको उद्घाटन प्रधानमन्त्री केपी शर्मा ओलीले गर्ने आयोजक समितिले जनाएको छ । सम्मेलनको अन्त्यमा काठमाडौँ घोषणापत्रसमेत जारी गरिने छ । यस विषयमा पहिलोपटक सम्मेलन आयोजना गर्न लागिएको हो ।