काठमाडौं– प्रधानमन्त्री केपी शर्मा ओलीले प्रतिनिधि सभाको बैठकमा झण्डै ४५ मिनेट लामो सम्बोधन गरेका छन् । 

स्वास्थोपचार गरेर गतसाता मात्र स्वदेश फर्केका ओलीले संसदको रोष्ट्रममा पौने घण्टा उभिएर सम्बोधन गरेका हुन् । 

अन्य बेला प्रतिपक्षी दल नेपाली कांग्रेसप्रति आक्रामक देखिने ओली आज संयमित देखिए । प्रणाली उल्ट्याउन चलखेल गरिरहेको भन्दै उनले राजतन्त्रका समर्थकप्रति सरकार कडा हुने संकेत भने गरे ।

प्रणालीको रक्षाका लागि सबै दल र नेताहरू एकताबद्ध हुनु अपरिहार्य रहेको उनको भनाइ थियो ।

‘सम्पूर्ण राजनीतिक दललाई आग्रह गर्न चाहन्छु, संसद्को गरिमा कायम राख्ने कुरामा ध्यान दिऔं, त्यसै अनुसार अगाडि बढौं । बीचमा कुनै कमी–कमजोरी देखिए सच्याएर अगाडि बढौं,’ ओलीले भने, ‘लोकतन्त्र, प्रणालीको रक्षा र देशमा आर्थिक विकासका लागि एकजुट भएर अगाडि बढ्न जरुरी छ । एकताका लागि सबै पार्टी, दलका नेताहरूलाई राष्ट्रव्यापी रूपमा एकताबद्ध भएर अगाडि बढ्न आह्वान गर्दछु ।’

अर्को चुनावपछि आफूलाई पदमा बस्न मन नभएको उनले बताए ।

'सरकार जाने भयो, प्रधानमन्त्री लगलग काँपेका छन् भन्ने पनि सुनिन्छ । पद नगएको दुनियाँमा कोही देखेको छैन, राजा–महाराजा, सम्राट वादशाह सबैको पद जान्छ,' प्रधानमन्त्री ओलीले भने– 'आगामी निर्वाचनपछि मलाई पनि बस्न मन छैन । निर्वाचनसम्म धैर्य गरिदिन आग्रह गर्दछु ।'

ओलीले शान्ति प्रक्रियासँग जोडिएको सत्य निरुपण तथा मेलमिलाप आयोग गठन यसै साता गर्ने तयारी रहेको जानकारी दिए ।

संसद्‍मा सम्बोधनका लागि असार ३ गते रोष्ट्रममा पुगेपनि प्रतिपक्षी दलको विरोधका कारण ओलीले सम्बोधन गर्न पाएका थिएनन् ।