काठमाडौं – ट्राफिक प्रहरीले सिसि क्यामराको सहयोगमा ट्राफिक नियम उल्लंघन गर्ने ८ हजार ९ सय ३९ सवारीसाधनका चालकलाई नियन्त्रणमा लिई कारवाही गरेको छ ।

महानगरीय ट्राफिक प्रहरी महाशाखाले आर्थिक वर्ष २०७५/०७६ मा उपत्यकाका विभिन्न स्थानमा ट्राफिक नियम उल्लंघन गर्ने सवारीसाधनका चालकलाई सिसि क्यामरा फुटेजको आधारमा सम्पर्कमा ल्याई कारवाही गरेको हो । 

महाशाखाले दिएको जानकारीअनुसार महानगरीय प्रहरी कार्यालय रानीपोखरीको कन्ट्रोल रुमबाट सडकमा खटिएको टोलीमार्फत ५ हजार ३ सय १४, महानगरीय प्रहरी कार्यालय रानीपोखरीको सीसी क्यामरा फुटेजको आधारमा १ हजार ९ सय ९७ र सर्भिलेन्स भेइकल र अन्य क्यामरामार्फत १ हजार ६९ चालकलाई कारवाही गरेको हो । 

महाशाखाका प्रमुख, प्रहरी वरिष्ठ उपरीक्षक वसन्त पन्त सिसि क्यामराको प्रयोगमार्फत सवारी नियम उल्लंघन गर्ने थुप्रै चालकलाई नियन्त्रणमा लिएर कारवाही गरेको बताउँछन् । ‘ट्राफिक प्रहरी देख्दा ट्राफिक नियम मान्ने, नदेख्दा ट्राफिक नियम उल्लंघन गर्ने प्रवृत्तिको अन्त्यका लागि सीसी क्यामरा सहयोगी बनेको छ,’ उनी भन्छन् । 

ट्राफिक नियम उल्लंघनका घटनासँगै महाशाखाले विक्रम संवत् २०७४ माघ २५ देखि सीसी क्यामराको प्रयोगमार्फत सवारीसाधनका चालकलाई कारवाही गर्दै आएको हो । महाशाखाले सीसी क्यामराका अतिरिक्त ड्यासबोर्ड क्यामरा, ग्रोप्रो क्यामरा, बडिवन क्यामरामार्फत पनि कारवाही गर्दै आएको छ । उपत्यकामा १० लाख हाराहारीमा सवारीसाधन सञ्चालनमा रहेका छन् ।