काठमाडौं– नेपाल दूरसञ्चार प्राधिकरणले नेपाल स्याटेलाइट टेलिकम प्रालिको अनुमति पत्र (लाइसेन्स) रद्द गरिदिएको छ । व्यापारी अजेयराज सुमार्गीको उक्त टेलिकम कम्पनीले हेलो नेपालका नाममा सेवा सञ्चालन गर्दै आएको छ ।

प्राधिकरणका प्रवक्ता मिनप्रसाद अर्यालले स्याटेलाइट टेलिकम प्रालिको अनुमति पत्र स्वतः रद्द भएको जानकारी दिए ।

‘तोकिएको बक्यौता तिर्न पटक–पटक ताकेता गर्नुका साथै समयसीमा पनि दिएका थियौं, तर भदौ १ को समयसीमाभित्र पहिलो किस्ता समेत नबुझाएपछि अनुमति दिँदाका शर्तअनुसार अनुमति स्वतः खारेज भएको छ,’ प्रवक्ता अर्यालले लोकान्तरसँग भने ।

अर्यालका अनुसार प्राधिकरणले भदौ १ भित्र पहिलो किस्ताको करीब ७ करोड बुझाउन समयसीमा दिइएको थियो । बाँकी रकम ३ महिनाभित्र बुझाउने विकल्प सुमार्गीलाई थियो ।

‘भदौ १ भित्र पहिलो किस्ताको रकम ७ करोडको हाराहारीमा तिर्न हामीले समयसीमा दिएका थियौं, बाँकी रकम त्यसपछिको ३ महिनाभित्र तिर्न सकिने विकल्प थियो, तर पहिलो किस्ताको रकम समेत नबुझाएपछि लाइसेन्स स्वतः रद्द भएको छ,’ प्रवक्ता अर्यालले भने ।

उनका अनुसार हेलो नेपालले बुझाउनुपर्ने रोयल्टी र नवीकरण शुल्कको बक्यौता रकम असार मसान्तसम्मको करीब ७९ करोड ९२ लाख छ ।