बाजुरा – कालोपत्र गरेको २ वर्ष भइसक्दासमेत साँफे–मार्तडी सडकको अवस्थामा सुधार भएको छैन । 

सडक छेउछाउबाट पहिरो खस्ने क्रम नरोकिएपछि हरेक वर्षात्मा अवरुद्ध हुने गरेको छ । ५७ मध्ये ३० किलोमिटर पहिलो चरण र २७ किलोमिटर दोस्रो चरणमा सडक कालोपत्र गरिएको थियो । 

पहिला कालोपत्र गरिएको अछामको साँफेबगरदेखि बार्जुगाडसम्मको ३० किलोमिटर सडकमा धेरै समस्या नदेखिएपनि बार्जुगाडदेखि मार्तडीसम्मको २७ किलोमिटर सडकमा बढी समस्या देखिएको छ । वर्षात्मा साँफे–मार्तडी सडक प्रत्येक दिनजसो अवरुद्ध हुने गरेको प्रहरी नायव उपरीक्षक उद्धवसिंह भाटले बताए ।

बूढीगंगा नगरपालिका–१ को द्ववारीमा खसेको ठूलो पहिरोबाहेक अरु साना–साना पहिरोका कारण पनि सडक अवरुद्ध भइरहने गरेको उहाँको भनाइ छ । सडक अवरुद्ध भएलगत्तै प्रहरीको सक्रियता बढ्ने गरेको छ । प्रत्येक दिन सडक क्षेत्रमा प्रहरी गस्ती तैनाथ गर्ने गरिएको छ । मार्तडीको थुवाकाँधमा खसेको पहिरो र रुख प्रहरी तथा स्थानीयले पन्छाएका छन् ।

तत्काल डोजर उपलब्ध नहुने र रकमको कुरामै समय बित्ने हुँदा प्रहरी नै परिचालन गरेर सकेजति पन्छाउने गरिएको छ ।

पहिरो पन्छाउन नेपाल प्रहरी, सशस्त्र प्रहरी, स्थानीय र कहिलेकाहीँ नेपाली सेनासमेत परिचालन हुने गरेका छन् । २ दिनदेखि अवरुद्ध थुवाकाँधको पहिरो पन्छाएपछि सोमवार साँझबाट साना सवारीसाधन सञ्चालन भएका प्रहरीले जनाएको छ । पहिरोसँगै खसेको सल्लाको रुख नेपाल प्रहरीको टोलीले पन्छाएको हो ।

साँफे–मार्तडी सडकले बाजुरालाई सास्ती मात्रै दिँदै आएको छ । प्रहरी, स्थानीयवासी, व्यवसायी मिलेर प्रत्येक दिन सडक बनाउनुपर्ने बाध्यता रहेको जयमालिका यातायात प्रालिका कोषाध्यक्ष कालु नाथले बताए ।

कालोपत्र गरिएको सडक भन्न पनि लाजमर्दो विषय रहेको उनको भनाइ छ । कालोपत्र आफैंमा कमजोर गरिएको छ । त्यसैमा डोजर प्रयोग गरी निर्माण गरिएको सडक अझै सतहमा बसेको छैन । पानी पार्नसाथ सडक माथिको पहाड खस्ने गरेको छ । प्राविधिकका अनुसार भूगोल नै कमजोर भएकाले अझै ५ वर्षसम्म समस्या देखिने छ । 

सडक कालोपत्र गरेको पीएस कम्पनीका साइड इन्चार्ज प्रेम थापाले सतह नै कमजोर भएकाले केही वर्ष पहिरो खस्ने डर रहेको बताए । साँफे–मार्तडी सडकको रुट नै नदीको किनारा र पहाडको फेदीमै भएकाले पहिराको उच्च जोखिम रहेको सडक डिभिजन कार्यालय साँफेका इञ्जिनीयर दमन विष्टले जानकारी दिए । पानी परिरहेकाले भदौको अन्तिमसम्म समस्या स्थानीयले खेपिरहनुपर्ने अवस्था छ ।

सडकको वैकल्पिक मार्ग निर्माण शुरू

साँफे–मार्तडी सडकको द्ववारी क्षेत्रमा वैकल्पिक मार्ग निर्माणको काम थालिएको छ । पहिरोले भत्किएको क्षेत्रलाई केन्द्रित गरी स्थानीयवासीसँग सहमति गरेर नयाँ मार्ग निर्माणको काम आइतवारबाट शुरू गरिएको हो । पहिरोले भत्किएको करीब १०० मिटर क्षेत्रलाई जोगाएर त्यसैको माथिबाट बाटो निर्माण शुरू गरिएको प्रमुख जिल्ला अधिकारी गंगाप्रसाद न्यौपानेले बताए ।

सडकमाथिपट्टिको टीकाराम पाध्यायको घर भत्काएर सोही घरलाई नै नयाँ मार्ग निर्धारण गर्न लागिएको हो । सडक डिभिजन कार्यालय साँफेबगरको डोजर लगाएर बाटो निर्माण थालिएको छ । – गंगाराज पण्डित/रासस