कांग्रेस र समाजवादी पार्टीभित्र विद्रोह, प्रदेशको नाम र राजधानीमा छुट्टै प्रस्ताव दर्ता

भदौ ५, २०७६

जनकपुरधाम – २ नम्बर प्रदेशको नाम र राजधानीका सन्दर्भमा सत्तारुढ समाजवादी पार्टी नेपाल र नेपाली कांग्रेसमा विद्रोह भएको छ ।

दुवै पार्टीका संसदीय दलको बैठकले प्रदेश राजधानी जनकपुरधाम क्षेत्रमा राख्ने निर्णय गरेपनि बारा र पर्सा जिल्लाका सांसदले विद्रोह गर्दै राजधानी वीरगञ्ज महानगरपालिकासहित आसपासमा राख्न छुट्टै प्रस्ताव दर्ता गराएका छन् ।


ADVERTISEMENT

कांग्रेस पर्साका सांसद राजेश्वरप्रसाद शाहले वीरगञ्ज महानगरपालिकालाई २ नम्बर प्रदेशको राजधानी बनाउनुपर्ने प्रस्ताव प्रदेश सभामा दर्ता गराएका छन् । उनको पार्टीले जनकपुरधामलाई राजधानी बनाउने प्रस्ताव दर्ता गराएको छ । 

विद्रोही प्रस्तावमा शाहसहित शंकरप्रसाद चौधरी, ओमप्रकाश शर्मा र असियादेवी थरुनी सहभागी छन् । विद्रोही सांसदले प्रदेशको नाम मध्य मधेश प्रदेश राख्न प्रस्ताव गरेका छन् ।

सत्तारुढ समाजवादी पार्टीका सांसद सिंहासन शाह कलवार, प्रह्लाद गिरी गोस्वामी, करिमा बेगम, जनत अन्सारी, अञ्जु यादव, भीमा यादव र रागिनीदेवी बर्णवालले समेत पार्टीको निर्णय विपरीत प्रदेशसभामा छुट्टै प्रस्ताव गर्दा गराएका छन् । प्रदेशको नाममा पार्टीकै निर्णय मान्य भएपनि राजधानीको सन्दर्भमा विद्रोही सांसदको फरक मत रहेको छ ।

विद्रोही सांसदले प्रदेशको राजधानी वीरगञ्ज महानगरपालिकादेखि बिन्ध्यबासिनी, पोखरिया, सखुवा, जितपुर, निजगढ हुँदै सिम्रौनगढसम्म हुनुपर्ने प्रस्ताव गरेका छन् । 

राजपाको निर्णय : प्रदेश राजधानी धनुषादेखि महोत्तरीसम्म, नाम ‘मधेश’

नेकपाको प्रस्ताव दर्ता : प्रदेश राजधानी बृहत्तर जनकपुर क्षेत्र, नाम ‘जानकी’

कांग्रेसको प्रस्ताव : प्रदेश राजधानी जनकपुरधाम, नाम ‘मिथिला भोजपुरा’

भदौ ५, २०७६ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस