प्रचण्ड र माधव नेपालबीच खुमलटारमा २ घण्टा छलफल, ओलीसँगको भनाभनपछि सम्झाउने प्रयास !

फाइल फोटो
भदौ ६, २०७६

काठमाडौं – प्रमुख सत्तारूढ दल नेपाल कम्युनिस्ट पार्टी (नेकपा) को सचिवालय बैठकमा अध्यक्ष केपी शर्मा ओली र नेता माधवकुमार नेपालबीच भनाभन भएको भोलिपल्ट अर्का अध्यक्ष पुष्पकमल प्रचण्डले नेपालसँग  छलफल गरेका छन् । छलफल प्रचण्ड निवास खुमलटारमा करीब २ घण्टा चलेको थियो ।

बिहीवारको बैठकमा अध्यक्ष ओली र नेता नेपालबीच चर्चाचर्की नै परेको थियो । अध्यक्ष ओलीले नेपालका तर्फबाट स्वास्थ्य लाभको कामना समेत चाहिँदैन भनेको सार्वजनिक भएको थियो ।


ADVERTISEMENT

नेता नेपाल आफ्नो वरीयता एक स्थान तल झारेपछि असन्तुष्ट छन् । साथै हालै टुंगिएको विभागहरूको नेतृत्वमा समेत उनको असन्तुष्टि छ ।

नेपालले आफ्नो ७ बुँदे नोट अफ डिसेन्ट नै सार्वजनिक गरेका छन् । यद्यपि उनको असन्तुष्टिबारे सचिवालय बैठकमा भने औपचारिक छलफल समेत हुन सकेको छैन ।

दुई शीर्ष नेताबीच तिक्तता बढिरहेका बेला अध्यक्ष प्रचण्डले नेता नेपालसँग गरेको छलफललाई अर्थपूर्ण रूपमा हेरिएको छ ।

प्रचण्ड र नेपालबीच छलफल चलिरहेका बेला नेता जनार्दन शर्मा समेत खुमलटार पुगेका थिए । 'म छुस्स पुगेको थिएँ,' नेता शर्माले लोकान्तरसँग भने । आफू धेरैबेर नबसेकाले थप कुरा भने थाहा नभएको उनले बताए । 

स्रोतका अनुसार प्रचण्ड पार्टीमा मिलेर अगाडि बढ्नुपर्छ भनेर नेपाललाई सम्झाउने प्रयास गरेका थिए ।

प्रधानमन्त्री एवं अर्का अध्यक्ष ओली भने उपचारका लागि सिंगापुरमा छन् ।

भदौ ६, २०७६ मा प्रकाशित

प्रतिक्रिया दिनुहोस