हंशपुरका मेयर मण्डलसहित ४ जनाविरुद्ध हत्या अपराधको जाहेरी दर्ता

भदौ १९, २०७६

जनकपुरधाम – धनुषाको हंशपुर नगरपालिकाका प्रमुख (मेयर) रामज्ञान मण्डलविरुद्ध ज्यान सम्बन्धी कसूर अन्तर्गतको किटानी जाहेरी जिल्ला प्रहरी कार्यालय धनुषामा बिहीवार दर्ता गरिएको छ ।

हंशपुर नगरपालिका–२ बघचौडाका स्थानीय ५५ वर्षीय तपेश्वर मण्डलको कुटपिटका कारण उपचारको क्रममा मृत्यु भएको भन्दै मेयर मण्डलसहित ४ जनाविरुद्ध जाहेरी दर्ता गरिएको हो ।


ADVERTISEMENT

मृतक मण्डलका छोरा राजकुमार मण्डलले दिएको किटानी जाहेरीमा नगरपालिकाको वडा नम्बर ३ का वडाध्यक्ष उदयकुमार सिंह, कार्यपालिका सदस्य श्याम राउत र वडा नम्बर ४ का स्थानीय लालबाबु यादवविरुद्ध समेत किटानी जाहेरी दर्ता गरिएको जाहेरवाला मण्डलले बताए ।

जिल्ला प्रहरी कार्यालय धनुषाका प्रवक्ता समेत रहेका प्रहरी नायव उपरीक्षक (डीएसपी) रामेश्वर कार्कीले जाहेरी दर्ता भएको तर कुन–कुन व्यक्तिको नामसहित किटानी दर्ता भएको भन्नेबारे आफूले जानकारी नपाएको बताए । ‘हंशपुर नगरपालिकामा मेयर र उपमेयरबीच केन्द्र सार्ने विषयमा झडप हुँदा घाइते भएका मण्डलको बुधवार साँझ मृत्यु भएको थियो,’ डीएसपी कार्कीले लोकान्तरसँग भने, ‘जाहेरी दर्ता त भएको छ तर अनुसन्धान गरेर दोषी देखिए मात्र कारबाही हुनेछ ।’ अनुसन्धान नै नभएको अवस्थामा केही भन्न नमिल्ने उनले बताए ।

जाहेरी दर्ता भएसँगै शवको पोस्टमार्टम गरेर शव परिवारलाई बुझाइने र पोस्टमार्टमको रिपोर्ट अनुसार अनुसन्धानको प्रक्रिया अगाडि बढ्ने डीएसपी कार्कीले बताए । वडा नम्बर २ बघचौडाका वडाध्यक्ष उदयकुमार साहका अनुसार पोस्टमार्टमपछि शवलाई शुक्रवार नगर परिक्रमा गराएर मात्र दाहसंस्कार गरिने छ ।

मेयर मण्डलले साउन २१ गते नगरपालिकाको केन्द्र बघचौडाबाट जबरजस्ती अन्यत्र सारेर कागजात लैजान खोज्दा भएको झडपमा प्रहरीले प्रदर्शनकारीमाथि लाठीचार्ज गरेको थियो । प्रदर्शनमै मेयर मण्डलले स्थानीय तपेश्वर मण्डललाई कुटपिट गरेको आरोप लगाइएको छ । उनको कम्मरसहित तिघ्राको हड्डी भाँचिएको थियो । उपचारका क्रममा मण्डलको बुधवार साँझ मृत्यु भएको थियो ।

घाइते मण्डलको मृत्यु भएपछि बघचौडा गाउँका स्थानीय बुधवार राति नै आएर जनकपुर अञ्चल अस्पतालमा प्रदर्शन गर्दै मेयर मण्डललाई कारबाहीको माग गरेका थिए । ६ वटा ट्रयाक्टरमा बिहीवार जनकपुर आएर स्थानीयले जाहेरी दर्ता गर्न माग गर्दै जिल्ला प्रहरी कार्यालय धनुषा अगाडि नाराबाजी गरेका थिए । 

शुरूमा जाहेरी दर्ता गर्न नमानेको धनुषा प्रहरीले बाध्य भई बिहीवार ४ बजे जाहेरी दर्ता गरेको छ । स्थानीय दिपेन्द्र यादवका अनुसार जाहेरी दर्ता नम्बर १४० रहेको छ ।

यो पनि पढ्नुहोला –

कार्यालय सार्न खोज्दा मेयरविरुद्ध उपमेयरको आन्दोलन, लम्बिँदै विवाद

भदौ १९, २०७६ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस