स्कटल्यान्डमाथि बेल्जियमको सानदार जीत, डे ब्रुएनको उत्कृष्ट प्रदर्शन

भदौ २४, २०७६

काठमाडौं–  युरो २०२० छनोट अन्तर्गत सोमबारको खेलमा बेल्जियमले स्कटल्यान्डलाई ४-० को फराकिलो अन्तरले पराजित गरेको छ । म्यानचेस्टर सिटीका मिडफिल्डर केभीन डे ब्रुएनको उत्कृष्ट प्रदर्शनमा बेल्जियमले जीत निकालेकाे हाे ।

बेल्जियमको जितमा डे ब्रुएनले एक गोल र ३ असिस्ट प्रदान गरेका थिए । छनोटमा लगातार छैटौं जित दर्ता गर्ने क्रममा बेल्जियमले पहिलो हाफमा नै ३-० को अग्रता कायम गरेको थियो । खेलको नवौं मिनेटमा रोमेलु लुकाकुले बेल्जियमलाई अग्रता दिलाए । अन्तर्राष्ट्रिय करिअरको ४९ औं गोल गर्ने क्रममा लुकाकुले डे ब्रुएनको पासलाई सदुपयोग गरे ।


ADVERTISEMENT

थोमस भर्मालेनले २४ औं मिनेटमा बेल्जियमको अग्रता दोब्बर पारे । डे ब्रुएनले दायाँ विंगबाट दिएको क्रसलाई भर्मालेनले पहिलो टचमा नै गोलमा परिणत गरे । ३२ औं मिनेटमा टोबी एल्डरवेरल्डको गोलमा बेल्जियमले ३-० को अग्रता लियो । उनले डे ब्रुएनको कर्नरमा गरेको हेडर स्कटल्यान्डका गोलरक्षक मार्शलले बचाउन सकेनन् ।

खेलको ८२ औं मिनेटमा लुकाकुको पासमा डे ब्रुएनले उत्कृष्ट गोल गर्दै बेल्जियमको जित पक्का गरे । खेल अवधिभर ब्रुएनले सबै पक्षमा राम्रो प्रदर्शन गरे ।  

भदौ २४, २०७६ मा प्रकाशित

प्रतिक्रिया दिनुहोस