काठमाडौं – बेलायतका प्रधानमन्त्री बोरिस जोनसनले मंगलवारबाट शुरू भएर अक्टोबर १४ सम्मका लागि संसद् निलम्बन गरेपछि उनका प्रतिस्पर्धीहरू रिसाएका छन् । उनले संसदीय निगरानीविना सम्झौताविहीन ब्रेक्जिट गराउन खोजेर खराब व्यवहार देखाएको आरोप विपक्षीहरूले लगाएका छन् । 

संसद् निलम्बनको घोषणा गर्दै कन्जर्भेटिभ पार्टीका जोनसनले सम्झौताविहीन ब्रेक्जिट रोक्नका लागि सांसदहरूले प्रयास गर्न सक्ने भन्दै संसदविरुद्ध कू गरेको दाबीलाई खारेज गरे । सांसदहरूको समर्थनका लागि एक महत्त्वाकांक्षी कार्यक्रम अगाडि ल्याउनका लागि यो निलम्बन आवश्यक रहेको उनको अडान थियो ।

आमनिर्वाचनमा विजय हासिल गरेर नयाँ सरकार बनेपछि संसद् निलम्बन गर्ने सामान्य अभ्यास भए पनि आलोचकहरूले अहिलेको निलम्बन चाहिँ ब्रेक्जिट प्रक्रियाको निगरानी गर्नबाट सांसदहरूलाई रोक्न गरिएको आरोप लगाएका छन् । 

विपक्षी लेबर पार्टीका नेता जेरेमी कोर्बीनले जोनसनको निर्णयको आलोचना गरे । 

उनले भने, ‘यो निन्दनीय छ । अहिले संसद् बस्नुपर्ने हो र संसद्ले सरकारलाई जवाफदेही बनाउनुपर्ने हो ।’

स्कटिश नेसनल पार्टीका वेस्टमिन्स्टर नेता इयन ब्ल्याकफोर्डले जोनसनबाट अलोकतान्त्रिक व्यवहार भएको आरोप लगाए । आफूसँग संसद्को समर्थन छैन भन्ने थाहा पाएरै जोनसनले संसद् निलम्बन गरेको उनको भनाइ छ । 

संसद् निलम्बन गर्ने जोनसनको निर्णय उल्ट्याइपाऊँ भनी दिइएको निवेदन एडिनबरा अदालत र लन्डन स्थित उच्च अदालतले खारेज गरिदिएको थियो । 

छिट्टै आमनिर्वाचन गराउनका लागि जोनसनले संसदमा मतदान गराउँदा बहुमत सांसदले त्यसलाई खारेज गरिदिएका थिए । बेलायत सरकारले अक्टोबर ३१ पछि पनि ब्रेक्जिट सम्झौता कायम गराएमा मात्र आमनिर्वाचनको बाटो खोल्ने विपक्षी दलहरू सहितका सांसदको मत छ ।

एजेन्सी