काठमाडौं – नेपाली कांग्रेसको भ्रातृ संस्था नेपाल विद्यार्थी संघको निर्वाचन चाँडो गर्न विद्यार्थी नेताले माग गरेका छन् ।

नेविसंघ महाधिवेशन पक्षधर विद्यार्थीले मंगलवार पत्रकार सम्मेलन गरी पार्टी नेतृत्वको कमजोरीका कारण भातृ तथा शुभेच्छुक संस्थाको महाधिवेशन हुन नसकेको भन्दै चाँडो गर्नुपर्ने माग गरेका हुन् ।

नेविसंघका नेता लिलाबल्लभ दाहालले वर्तमान पार्टी नेतृत्व इतिहासमै कमजोर भएको आरोप लगाए । ‘पार्टी सभापतिमात्र नभई सिंगो कांग्रेसको केन्द्रीय समिति नै असक्षम बनेको छ,’ उनले भने ।

नेविसंघका नेता क्षितिज भण्डारीले पार्टी नेतृत्वले समयमै निर्वाचनको मिति घोषणा गरेर अगाडि नबढे आमरण अनशन बस्ने बताए । नेविसंघको निर्वाचनमार्फत नेतृत्व चयन गरी पार्टी बलियो बनाउनुपर्ने उनको भनाइ थियो । 

नेविसंघका नेता मोती भण्डारीले भातृ संस्थाको महाधिवेशन नगराएर पार्टी जागरण अभियानमा जानु सान्दर्भिक कुरा नभएको बताए । निवर्तमान कोषाध्यक्ष शिव रिमालले कांग्रेसजस्तो लोकतान्त्रिक पार्टीमा नेविसंघले आन्तरिक लोकतन्त्र खोज्नुपर्ने अवस्था आउनु विडम्बना भएको बताए ।