कानमा गाई र ओम शब्द पर्दा केही मानिस चिढिन थाल्छन् : मोदी

भदौ २५, २०७६

काठमाडौं – भारतका प्रधानमन्त्री नरेन्द्र मोदीले बुधवार मथुरामा स्वच्छता नै सेवा हो नामक अभियान शुरू गरेका छन् । 

नदी, जलाशय र तलाउमा बस्ने प्राणीले प्लास्टिक निलेपछि बाँच्न गाह्रो हुने मोदीको भनाइ छ । त्यसैले एकपटक प्रयोग गरेर फालिने प्लास्टिकबाट छुटकारा पाउनुपर्ने उनको भनाइ छ । 


ADVERTISEMENT

त्यसै अवसरमा मोदीले भने, ‘केही मानिसको कानमा ओम र गाई शब्द पर्नेबित्तिकै रौं ठाडो हुनु देशको दुर्भाग्य हो । यी शब्द उच्चारण गर्दा देश १६औं शताब्दीमा पुगेको उनीहरू ठान्छन् । प्राचीन ज्ञान अनि यस देशलाई बर्बाद गर्न उनीहरूले प्रयास गरिरहेका हुन्छन् ।’

मोदीले मथुरामा फोहर उठाउने महिलाहरूसँग भेटघाट गरे । मथुराका लागि एक हजार करोड भारुभन्दा बढीका योजनाहरूको शिलान्यास पनि उनले गरे । 

उनले पशु आरोग्य मेलाको पनि उद्घाटन गरे । मेलामा उनले किसानहरूसँग कुराकानी पनि गरे । 

मोदीले भने, ‘नयाँ जनादेशपछि भगवान् कृष्णको नगरीमा पहिलोपटक आउने सौभाग्य प्राप्त गरें । भारतसँग श्रीकृष्ण जस्तो प्रेरणाको स्रोत हुनुहुन्छ र उहाँको कल्पना वातावरणप्रेम विना अधुरो छ । यमुना भनिन् कालिन्दी अनि हरियो घाँस चरिरहेको धेनु । यी विना श्रीकृष्णको तस्वीर पूरा हुन्छ त ? दूध, दही, माखन विना बालगोपालको कल्पना कसैले गर्न सक्छ ? प्रकृति, पशुधन र वातावरण विना हाम्रा आराध्य जति अधुरो लाग्नुहुन्छ, त्यति नै अधुरोपन भारतमा पनि देखिनेछ । प्रकृतिको सन्तुलन बनाएर मात्र हामी नयाँ भारततर्फ अघि बढ्नेछौं ।’

एजेन्सी

भदौ २५, २०७६ मा प्रकाशित

प्रतिक्रिया दिनुहोस