कर्णालीको सिमी सहुलियत मूल्य पसलमा

भदौ २७, २०७६

काठमाडौं–स्थानीय उत्पादनलाई प्रोत्साहन दिने गरी सरकारले बिक्री थालेको कर्णालीको सिमी र तितेफापर सहुलियत मूल्य पसलबाट बिक्री भइरहेको छ ।

दशैं, तिहार, छठ लगायतका चाडपर्वलाई लक्षित गरी सरकारले सञ्चालन गरेका सहुलियत मूल्य पसलमा कर्णालीका स्थानीय उत्पादन सिमी र तितेफापर बिक्री भइरहेको हो ।


ADVERTISEMENT

खाद्य व्यवस्था तथा व्यापार कम्पनीले सहुलियत मूल्य पसलमार्फत काठमाडौं उपत्यकामा कर्णालीको सिमी र तितेफापर बिक्री भइरहेको कम्पनीका प्रबन्ध निर्देशक योगेन्द्र गौचनले जानकारी दिए ।

उनका अनुसार सहुलियम मूल्य पसलबाट सिमी र फापर १० रुपैयाँ सस्तोमा बिक्री भइरहेको छ ।

यसअघि कर्णालीबाट खरिद गरेर ल्याएर थापाथली स्थित कम्पनीको गोदामबाट प्रतिकिलो १ सय ३० रुपैयाँका दरले बिक्री गरिरहेको सिमी सहुलियत मूल्य पसलमा १ सय २० रुपैयाँका दरले बिक्री भइरहेको छ ।

यसअघि थापाथलीमा ८० रुपैयाँ प्रतिकिलोका दरले बिक्री गरिरहेको तितेफापर सहुलियत मूल्य पसलमा प्रतिकिलो ७० रुपैयाँमा बिक्री भइरहेको छ ।

यअसघि केन्द्र सरकारले स्थानीय उत्पादनलाई प्रोत्साहन गर्ने उद्देश्यले कर्णालीको सिमी र फापर काठमाडौं उपत्यकामा ल्याएर बिक्री गर्दै आएको थियो ।

आर्थिक वर्ष २०७०/०७१ देखि बिक्री थालिएको सिमी र फापरको पछिल्लो समय उत्पादन बढेपनि बिक्री घटेको छ ।

थापाथली गोदामबाट मात्रै बिक्री भएका कारण खुद्रामा बिक्री हुन नसकेको भन्दै सहुलियम मूल्य पसलमा राखिएको खाद्य व्यवसाय तथा व्यापार कम्पनीका खरिद बिक्री विभाग प्रमुख लालमोहन ठाकुरले जानकारी दिए ।

‘थापाथली गोदामबाट मात्रै बिक्री गर्ने गरिएको थियो’ उनले भने, ‘१ किलो, २ किलो खरिद गर्न टाढाबाट खासै आउन नरुचाउने हुनाले त्यो बिक्री हुन सकेन ।’

थापाथली गोदामबाट बिक्री नभएपछि कम्पनीले गत असार ४ गते थोकमै बिक्री गर्नका लागि टेण्डर आह्वान गरेको थियो २१ दिनको अवधि दिँदै गरिएको टेण्डर आह्वानमा कुनै पनि टेण्डर नपरेकोले सहुलियम मूल्य पसलबाट बिक्री गरिरहेको कम्पनीका प्रतिनिधिहरूले बताए ।

सहुलियत मूल्य पसल सञ्चालन हुनुअघिसम्म कम्पनीसँग ७१७ क्वीन्टल सिमी र ६५४ क्वीन्टल तितेफापर मौज्दात रहेको थियो ।
 

भदौ २७, २०७६ मा प्रकाशित

प्रतिक्रिया दिनुहोस