काँग्रेस नेतृ सोनियाले बोलाएको बैठकमा नेता राहुल नै अनुपस्थित

भदौ २७, २०७६

नयाँ दिल्ली- भारतीय राष्ट्रिय काँग्रेसकी अन्तरिम अध्यक्ष सोनिया गान्धीले बोलाएको महत्वपूर्ण र निर्णायक मानिएको बैठकमा निवर्तमान अध्यक्ष राहुल गान्धी अनुपस्थित हुनुभएको छ ।

बैठकका लागि उहाँलाई बोलाइएको र स्मरण गराइएको भएपनि उहाँ उपस्थित नहुनुभएको नेताहरूले जानकारी दिएका छन् । 


ADVERTISEMENT

सन् २०१७ मा पार्टी अध्यक्ष बन्नुभएका राहुलले केही महिना अगाडि भएको निर्वाचनमा पार्टीको नराम्रो पराजय भएपछि नैतिकताको आधारमा पार्टी अध्यक्षबाट राजिनामाको घोषणा गर्नुभएको थियो ।

उहाँलाई पार्टीका धेरै नेता तथा कार्यकर्ताहरूले राजिनामा फिर्ता लिन पटक पटक आग्रह गर्दा पनि अस्वीकार गर्दै आउनुभएको थियो । 

पार्टी केन्द्रीय कार्यालयमा पार्टीका महासचिवहरू, प्रदेश अध्यक्षहरू, पार्टीका सांसदहरूलगायतको संयुक्त बैठकमा उहाँ अनुपस्थित हुनुभएको हो । 

नेता गान्धी अहिले कांग्रेस पार्टीको कुनै पदाधिकारी नभएपनि केन्द्रीय सदस्य र सांसद भने हुनुहुुन्छ । उहाँ हालै भएको आम निर्वाचनमा वायानादबाट लोकसभामा निर्वाचित हुनुभएको हो ।

राहुल निकट श्रोतले एएनआईलाई दिएको जानकारी अनुसार उहाँले पार्टीको महत्वपूर्ण जिम्मेबारी आफुले त्याग गरिसकेकाले अत्यावश्यक बाहेक पार्टीको महत्वपुर्ण बैठकहरूमा नजाने अडान लिनुभएको छ ।  

यसअघि उहाँले संविधानको धारा ३७० लाई सरकारले खारेज गरेको विषयमा छलफल गर्न आयोजित केन्द्रीय समितिको बैठकमा सहभागीता जनाउनु भएको थियो । 

राहुलले राजिनामा फिर्ता नलिएपछि पार्टीको अन्तरिम अध्यक्षका रूपमा पूर्व अध्यक्ष सोनीया गान्धीले जिम्मेवारी लिनुभएको छ ।  

झण्डै १२ बर्षपछि काँग्रेसको केन्द्रीय कार्यालयमा अहिले राहुलको कुनै ‘नेमप्लेट’ छैन भने उहाँले केन्द्रीय सदस्यका रूपमा मात्रै आफूलाई प्रस्तुत गर्ने गर्नुभएको छ । 
 

भदौ २७, २०७६ मा प्रकाशित

प्रतिक्रिया दिनुहोस

ताजा समाचार