बुटवल–बुटवल पाल्पा सडक खण्ड अन्तरगत पर्ने सिद्धबाबा मन्दिर नजिकै पहिरो खस्दा सिद्धार्थ राजमार्ग अवरुद्ध भएको छ । शनिबार बिहान सवा ९ बजे माथिबाट खसेको पहिरोका कारण पाल्पा, गुल्मी अर्घाखाँची, पोखरा बाग्लुङ जाने गाडी बुटवलमा रोकिएका छन् ।

त्यस्तै बुटवल आउदै गरेका गाडी पाल्पाको दोभारमा रोकिएका छन् । अहिले यस क्षेत्रमा भीषण  वर्षा भइरहेको छ ।

इलाका प्रहरी कार्यालय बुटवलका प्रमुख भीमलाल भट्टराईले पाल्पाको टोलीसँग समन्वय गरेर सडक खुुलाउने प्रयास भइरहेको लोकान्तरलाई जानकारी दिए । 

शुक्रबार सोही ठाउँमा खसेको पहिराले दुई वटा गाडी पुरिँदा १ जनाको मृत्यु भएको थियो भने, ४ जना गम्भीर घाइते भएका छन् । 

भारी वर्षा भइरहेकोले समेत भएर हिड्न यात्रुहरुलाई प्रहरीले आग्रह गरेको छ ।

सिद्धबाबा सडक जोखिमपूर्ण छ । जहाँ हिलो र खाल्डाखुल्डीले यात्रा गर्न पनि कठिन छ ।