काठमाडौँ - उपप्रधान तथा स्वास्थ्यमन्त्री उपेन्द्र यादवले डेंगुको संक्रमण नियन्त्रणमै रहेकाले आपतकालीन अवस्थाको घोषणा गर्न आवश्यक नरहेको बताएका छन् ।

बुधवार बसेको प्रतिनिधिसभा बैठकमा बोल्दै स्वास्थ्यमन्त्री यादवले नेपालमा लामखुट्टेबाट संक्रमण हुने अन्य रोगहरू पनि निवारण भइसकेकाले डेंगु नियन्त्रणका लागि सरकारले संचालन गरेका अभियानहरू प्रभावकारी बन्दै गरेको दाबी गरे ।

मन्त्री यादवले डेंगुबाट नेपालमात्र नभई अन्य एसियाली देशहरू पनि संक्रमित रहेको बताउँदै नेपालको समस्या ठूलो नभएको जिकिर गरेका छन् ।

'एसियाली मुलुक सिंगापुरमा ११ हजार बढी, बंगलादेशमा ७० हजार, श्रीलंकामा ५० हजार, थाइल्याण्डमा ५५ हजार, मलेसियामा ८२ हजार, फिलिपिन्समा २ लाख ५० हजारमा संक्रमण देखिएको छ,' यादवले भने, 'विश्वमा ३ दशमलव ९ अर्ब मान्छेहरू जोखिममा रहेका छन् भने विश्व स्वास्थ्य संगठनले डेंगुलाई १० प्रमुख खतरामध्ये राखेको छ ।'

२०६१ सालमा चितवनमा पहिलोपटक देखिएको डेंगुको संक्रमण त्यसपछि ३० गुणासम्म बढेको जानकारी यादवले दिए । 'अहिले ५६ जिल्लामा संक्रमणको जोखिम देखिएको छ,' उनले भने, 'हालसम्म ५ हजार ९५ जनामा संक्रमण देखिएको तर जम्मा ६ जनाको मृत्यु भएको छ । यो नेपालको मात्र नभएर विश्वकै चुनौतीका रूपमा देखिएको छ ।'

मन्त्री यादवले पछिल्लो समयमा डेंगुको संक्रमितहरूको संख्या विस्तारै घट्दै गइरहेको र नियन्त्रण उन्मुख रहेको बताए । उनले डेंगु गराउने लामखुट्टेको लार्भा खोज र नष्ट गर अभियाननै प्रभावकारी हुने दाबी गरे ।

हालसम्म ८५ वटा स्थानीय तहमा डेंगु नियन्त्रणका लागि १ करोड ६६ लाख रुपैयाँ विनियोजन गरिएको जानकारी यादवले दिए । उनका अनुसार प्रदेश सरकारमार्फत ६ करोड भन्दा बढी डेंगु नियन्त्रणका लागि खर्च भइसकेको छ ।