काठमाडौं– मुलुकमा डेंगुको महामारी फैलिरहेको समयमा सरकारका विभागीयले मन्त्री विदेश भ्रमणमा शयर गरेको भन्दै सांसदहरूले उपप्रधान एवं स्वास्थ्य मन्त्री उपेन्द्र यादवको चर्को आलोचना गरेका छन् । 

बुधवार प्रतिनिधि सभा बैठकमा देशभर डेंगुको अवस्थाबारे सार्वजनिक महत्त्वको विषयमा मन्तव्य राखेपछिको छलफलमा सत्तारुढ र प्रतिपक्षी सांसदहरूले प्रश्न गर्दै देशमा डेंगुको महामारी फैलिएको अवस्थामा विदेश भ्रमण गरेकोमा आपत्ति जनाएका हुन् । 

नेपाली कांग्रेसकी पार्वती डिसी चौधरीले साउन १ गतेदेखि देशमा डेंगुको महामारी फैलिएपनि २ महिनापछि संसद्मा जवाफ दिन आउनु गैरजिम्मेवारी भएको आरोप लगाइन् ।

‘साउन १ गतेदेखि डेंगु फैलिएको थियो, असोज १ गते आएर जवाफ दिनुभयो यो बीचमा उहाँ कहाँ जानुभएको थियो ? मन्त्रीज्यूलाई विदेश भ्रमणको मोह छ, फेरि जाँदै हुनुहुन्छ । नेपाली जनताले यस्तै मन्त्री खोजेका हुन्, धन्यवाद !’ चौधरीले भनिन् । 

कांग्रेसकै देवप्रकाश तिमिल्सिनाले देशका अस्पतालमा डेंगु रोगीको रगत परीक्षण गर्ने ठाउँ नभएको अवस्थामा मन्त्री विदेश भ्रमणमा गएको भन्दै आपत्ति जनाए । 

नेकपाका कृष्ण गोपाल श्रेष्ठले स्वास्थ्य मन्त्री र राज्यमन्त्री गैरजिम्मेवार भएको आरोप लगाए ।

‘सभामुखले रुलिङ गरेपछि मात्र संसद्मा उपस्थित हुने, यस्तो खालको गैरजिम्मेवारीप्रति उहाँको जवाफ के छ ? तीन–चार बजेदेखि रगत परीक्षण गराउन लाइन बसेका हुन्छन् । मन्त्री र राज्यमन्त्री टेकु अस्पतालमा जानुभएको छ ?’ उनले प्रश्न गरे ।  

लामखुट्टेश्वर महादेव स्थापना गरौं !

सत्तारुढ सांसद् विरोध खतिवडाले सरकारले डेंगु नियन्त्रणमा काम नगरेको भन्दै लामखुट्टेश्वर महादेव स्थापना गरेर शरण पर्न सुझाव दिए ।

‘हाम्रो देशमा अरूले नभएपछि देवी देवता गुहार्ने प्रचलन छ, २०४८ सालमा संसद् सचिवालय परिसर संसदेश्वर महादेव स्थापना गरिएको छ, संसद्‍मा केही नहोस् भनेर । मेरो निर्वाचन क्षेत्रमा लटरम्मेश्वर महादेवको स्थापना गरिएको छ, फलफूल लटरम्म फलोस् भन्नका लागि । सन्तान नहुनेका लागि सन्तानेश्वर महादेव छ,’ खतिवडाले भने, ‘डेंगु नियन्त्रण गर्नका लागि अब लामखुट्टेश्वर महादेव स्थापना गरेर अभियान चाल्ने कि ?’