काठमाडौँ - पाकिस्तानी प्रधानमन्त्री इमरान खानले भारतले संविधानको धारा ३७० हटाएपछि जम्मु कश्मीरमा उत्पन्न भएको परिस्थितिका बारेमा लगातार वक्तव्यबाजी गरिरहेका छन् ।

भारतीय सञ्चारमाध्यमहरूले उनको वक्तव्यबाजीलाई युद्दका लागि गरेको आमन्त्रण भनी टिप्पणी गर्ने गरेका छन् ।

भारतीय सञ्चारमाध्यम नवभारत टाइम्सले केही दिन अघि एक समाचार लेख्दै खानले आफू भारतविरुद्धको युद्धमा हार्ने घोषणा गरिसकेको दाबी गरेको छ ।

'प्रधानमन्त्री आफैले भारत विरुद्धको युद्धमा आफू हार्ने बताइसकेका छन्,' समाचारमा उल्लेख छ, 'पारम्पारिक युद्धमा हार्ने स्थिति आए पाकिस्तान परमाणु युद्धतर्फ धकेलिने सम्भावना छ । तर प्रधानमन्त्री खानले परमाणु युद्ध नगर्ने बताइसकेका छन् ।'

केही हप्ता अघि एक पाकिस्तानी च्यानललाई अन्तर्वार्ता दिँदै खानले भनेका थिए कि पाकिस्तानले परमाणु युद्धको खतरालाई नजरअन्दाज गर्न सक्दैन । 'म शान्तिवादी व्यक्ति हुँ,' खानले भनेका छन्, 'म युद्धविरोधी हुँ । लडाईबाट समस्या समाधान हुन सक्दैन भन्ने मेरो मान्यता हो ।'