काठमाडौं – सत्तारूढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल 'प्रचण्ड'ले कैलालीको टीकापुर घटनामा दोषी ठहरभै जेलजीवन बिताइरहेका निलम्बित सांसद रेशम चौधरीलाई स–सम्मान फिर्ता ल्याइने बताएका छन् ।

आइतवार सुनसरीको रामधुनीमा जितिया पर्वको अवसरमा आयोजित सभामा बोल्दै प्रचण्डले बालुवाटारमा यसबारे छलफल भएको बताए ।

'टीकापुर घटनामा जे भएको छ, हामीले अस्ति भर्खर बालुवाटारमा छलफल गरेका छौं,' उनले चौधरीको नाम नलिइकन भने, 'झुटा मुद्दा खारेज गर्ने प्रक्रियामा अघि बढेको छ । बन्दी अवस्थामा रहेकाहरू मुक्त हुन्छन् । जनताको विश्वास जितेर माननीय भएकालाई ससम्मान फिर्ता ल्याउने काम हुन्छ ।'

आफूले नेतृत्व गरेको जनयुद्धका दर्जनौं योद्धाहरू अझै पनि जेलमा भएको र यसले आफूलाई पीडा दिएको प्रचण्डको भनाइ छ ।

'मेरै आन्दोलनका दर्जनौं साथीहरू अझै पनि जेलमा छन्,' उनले भने, 'मलाई पनि पीडा छ । फेरि पनि प्राप्त उपलब्धिको रक्षा गर्ने र बाँकी उपलब्धि हासिल गर्ने बाटोतिर जानुको विकल्प छैन ।' 

प्रचण्डले संविधान संशोधनका लागि आफूले दुईपटक प्रस्ताव गरेको स्मरण गरे । 

संविधानका कतिपय व्यवस्थामा 'नोट अफ डिसेन्ट' राख्ने पहिलो नेता आफू भएको उनको दाबी छ ।

'म संविधानसभाको त्यस्तो राजनीतिक दलको त्यस्तो नेता हुँ जसले संविधान पूर्ण भएको छैन, धेरै संशोधन गर्नुपर्छ भनेर रिजर्भेसन राखेको थिएँ,' प्रचण्डले भने, 'मैले नोट अफ डिसेन्ट संविधान सभामै राखेको छु । संशोधनका निम्ति अगाडि बढ्नुपर्छ भनेर पटक-पटक अपिल गरिरहेको छु ।'
 
प्रचण्डले संयुक्त राष्ट्रसंघको रेकर्डमा पनि सबभन्दा धेरै त्याग/बलिदान गर्ने समुदाय थारू नै रहेको दाबी गरे । 

'संयुक्त राष्ट्रसंघको रेकर्डमा पनि सबभन्दा धेरै त्याग, बलिदानी गर्ने र बेपत्ता हुने थारू समुदाय नै भएको उल्लेख छ,' प्रचण्डले भने, 'थारूहरू सोझो, इमान्दार र मेहेनेती भएकैले शासकहरूले फुटाउने र राज गर्ने खेल खेलिरहेका छन् ।'