यूएनका कर्मचारीले अर्को महिना तलब नपाउने चेतावनी

असोज २३, २०७६

काठमाडौं – संयुक्त राष्ट्रसंघका महासचिव एन्टोनियो गुटेरेसले संस्थामा भयंकर आर्थिक संकट आइलागेको र कर्मचारीहरूलाई अर्को महिनाको तलब खुवाउन गाह्रो परेको बताएका छन् । उनले सदस्य राष्ट्रहरूलाई आफूले दिन बाँकी रहेको पैसा दिइहाल्न आह्वान गरे । 

राष्ट्रसंघले विगत एक दशकमा सबभन्दा खराब घाटा बेहोरिरहेको गुटेरेसले मंगलवार बताए । उनले राष्ट्रसंघको साधारणसभामा सन् २०२० को प्रस्तावित बजेटको बारेमा बोल्ने क्रममा यो कुरा बताएका हुन् । 


ADVERTISEMENT

राष्ट्रसंघले नोभेम्बर महिनामा तलब खुवाउने पर्याप्त नगद नरहेको स्थितिबाट आरम्भ गर्ने चेतावनी दिए । ‘हाम्रो काम र हाम्रा सुधारहरू जोखिममा छन्,’ उनले भने । 

स्थापनाको ७५ औं वर्षगाँठ मनाइरहेको राष्ट्रसंघले विश्व व्यवस्थामा परिवर्तन आउँदा अनेक किसिमका चुनौतीको सामना गरिरहेको छ । अमेरिकाका राष्ट्रपति डोनल्ड ट्रम्पले राष्ट्रसंघको बजेटमा अमेरिकाको योगदान कटाएपछि त्यहाँ बजेट अभाव चर्केको हो । 

गुटेरेसले जनवरी महिनादेखि खर्च कटौती गर्न थालिएको बताए । खर्चकटौती नगरेमा यूएनले अर्को वर्षको सेप्टेम्बर महिनामा साधारणसभा गर्न समेत पैसा नपुग्ने उनले बताए । 

राष्ट्रसंघमा अहिले नयाँ कर्मचारी राखिएको छैन र कर्मचारीले अत्यावश्यक यात्रा मात्र गर्न पाएका छन् ।

सीएनएनबाट
 

असोज २३, २०७६ मा प्रकाशित

प्रतिक्रिया दिनुहोस