काठमाडौं – दुईदिने राजकीय भ्रमणका लागि शनिवार साँझ काठमाडौं आइपुगेका चिनियाँ राष्ट्रपति शी चिनफिङ होटल सोल्टी पुगेका छन् ।

अपराह्न ४ बजेर ४५ मिनेट जाँदा त्रिभुवन अन्तर्राष्ट्रिय विमानस्थलमा अवतरण गरेका शीलाई विमानस्थलमै पुगेर राष्ट्रपति भण्डारीले स्वागत गरेकी थिइन् ।

उपराष्ट्रपति नन्दकिशोर पुन, प्रधानमन्त्री केपी शर्मा ओली, राष्ट्रिय सभा अध्यक्ष गणेशप्रसाद तिमिल्सिना, उपप्रधानमन्त्री तथा मन्त्रीहरू लगायतले पनि विमानस्थलमै पुगेर शीलाई स्वागत गरेका थिए ।

शीलाई विमानस्थलमै 'गार्ड अफ अनर' समेत दिइएको थियो । सो अवसरमा नेपाली सेनाले २१ तोपको सलामी दिएको थियो ।

सलामी सकिएपछि राष्ट्रपति शी सिधै सोल्टी होटल पुगेका हुन् ।

होटलमा छोटो बसाइपछि उनी राष्ट्रपति भण्डारीसँग भेटवार्ताका लागि राष्ट्रपति भवन शीतल निवास पुग्ने कार्यक्रम रहेको सुरक्षा स्रोतले लोकान्तरलाई जानकारी दियो ।

राष्ट्रपति भण्डारीसँग आधा घण्टाको भेटपछि शी पुन: सोल्टी होटल फर्किने छन् ।

राष्ट्रपति शीको स्वागतका लागि राष्ट्रपति भण्डारीले आयोजना गरेको रात्रिभोजमा सहभागी हुनुपूर्व उनले प्रमुख प्रतिपक्षी दल नेपाली कांग्रेसका सभापति शेरबहादुर देउवा र राष्ट्रिय सभाका अध्यक्ष गणेश तिमिल्सिनासँग छुट्टा–छुट्टै भेटवार्ता गर्नेछन् । उनीहरू दुवैले ७-७ सात मिनेट समय पाएका छन् ।

राष्ट्रपति शीले भोलि बिहान नेकपाका अध्यक्ष एवं पूर्व प्रधानमन्त्री पुष्पकमल दाहाल 'प्रचण्ड'सँग भेटवार्ता गर्नेछन् । त्यसपछि प्रधानमन्त्री केपी शर्मासँग भेटवार्ता हुनेछ । दुवै भेट २० मिनेटको हुने परराष्ट्र स्रोतले बतायो ।

प्रधामनन्त्रीसँगको भेटपछि नेकपा सचिवालयका सदस्यहरूसँग राष्ट्रपति शीको भेटवार्ता हुनेछ । भेटपछि राष्ट्रपति शीको उपस्थितिमा नेपाल सरकार र चीन सरकारबीच केही सहमतिपत्र हस्तान्तरण गर्ने कार्यक्रम छ ।

राष्ट्रपति शीको समय अभावका कारण सम्झौता पत्रमा पहिल्यै हस्ताक्षर भइसकेको हुनेछ । सम्झौतापत्र हस्तान्तरण कार्यक्रम सकिएपछि दिवाभोज गरेर राष्ट्रपति शी दिउँसो १२:५० मा स्वदेश फर्किने कार्यक्रम छ ।