दशैंको अवधिमा १९ लाख भेटी संकलन

कात्तिक ४, २०७६

वालिङ– स्याङ्जाको प्रसिद्ध तीर्थस्थल ग्रहौंसुर मन्दिरमा बडादशैंको अवधिमा रु १९ लाख ५० हजार भेटी संकलन भएको छ ।

वालिङ नगरपालिका–८ मा रहेको ग्रहौंसुर मन्दिर परिसरमा प्रहरी पोष्ट निर्माणका लागि रु आठ लाख २० हजार संकलन भएको छ । 


ADVERTISEMENT

ग्रहौंसुर धार्मिक एवम पर्यटकीय केन्द्रका अध्यक्ष सुरजप्रताप खाणका अनुसार भेटीस्वरुप रु तीन लाख एक हजार, पाठाको टाउको बिक्रीबाट रु दुई लाख ७९ हजार, परेवा बिक्रीबाट रु ८७ हजार, होटल भाडाबाट रु ७७ हजार, सवारीसाधन पार्किङ शुल्कबाट रु ६७ हजार, सदस्यता वितरणबाट रु ६२ हजार, दानपात्रबाट रु ४० हजार तथा दानबाट रु १६ हजार आम्दानी भएको छ ।

बडादशैंको अवधिभर मन्दिरमा रु तीन लाख २४ हजार खर्च भएको ग्रहौंसुर धार्मिक एवं पर्यटकीय केन्द्रका कोषाध्यक्ष केशभक्त गुरुङले जानकारी दिनुभयो । 

“बचत रकम विभिन्न पूर्वाधार निर्माणमा खर्च गरिनेछ”, उहाँले  भन्नुभयो, “मन्दिरको विकासका लागि बृहत्तर गुरुयोजना बनाएका छौँ ।”

मन्दिरमा बडादशैं र चैतेदशैंका अवसरमा मेला लाग्छ । बडादशैंको अवधिभर झण्डै ८० हजार श्रद्धालुले मन्दिरको दर्शन गरेको गुरुङले बताए ।

यहाँ स्याङ्जासहित पाल्पा, पर्वत, तनहुँ, कास्की, रुपन्देही, नवलपरासी, बाग्लुङलगायत जिल्लाबाट बढीजसो भक्तजन आउने गरेका छन् । 

कात्तिक ४, २०७६ मा प्रकाशित

प्रतिक्रिया दिनुहोस