काठमाडौं – क्रोएसियाका फूटबल इभान गाज्देकले मैदानमा आएको एउटो कुखुरोलाई लात हानेर मारेपछि सीधै रेड कार्ड पाएका छन् । 

गाज्देक एनके जेलेनग्रादका लागि जासेनोभाकविरुद्ध अर्धव्यावसायिक खेल खेलिरहँदा यो घटना भएको हो । खेल शनिवार भएको थियो । 

भिडियोमा गाज्देकले मैदानमा पसेका कुखुरीहरूको समूहलाई लखेटेको अनि एउटालाई लात हानेको र त्यो तत्कालै मरेको देखिन्छ । 

कुखरी मारेपछि उनले त्यसको सिनो समातेर दुईवटा प्रयासमा मैदानको पर्खालबाहिर फालेका थिए । 

खेलाडीले गर्नुपर्ने किसिमको व्यवहार नगरेको भनी रेफ्रीले आफूलाई रेड कार्ड दिएको गाज्देकले बताए । 

आफूले गरेको कामको व्याख्या गर्दै उनले भने, ‘मलाई विश्वास गर्नुस्, यो जानाजान गरिएको थिएन । त्यतिखेर खेलको परिणाम सुनिश्चित थिएन र म नर्भस थिएँ । कुखुराहरू मैदानमा प्रवेश गरिरहेका हुन्छन् र खेल रोक्नु परिरहेको हुन्छ । मैदानमा कुखुराको लिँडैलिँड भेटिन्छ, यो अस्वस्थकर छ । मैले कुखुराहरूलाई भगाउन खोजेको थिएँ । मैले गोडा हल्लाउँदा एउटा कुखुरा मर्न पुग्यो ।’

आफूले पशुलाई घृणा नगर्ने र एक कुकुर तथा दुई बिरालो पालेको उनले बताए । 

कुखुराकी मालिक्नीले त्यतिखेर घटनाको विरोध नगरेको तर आफूले माफी माग्दै एउटा नोट पठाएको र कुखुरो पनि पठाएको गाज्देकले बताए । 

गाज्देकले रेड कार्ड पाउँदा उनको टीम २–१ ले अघि थियो । पछि उनको टीमले उक्त खेल ८–१ ले जित्यो ।

टीमका प्रवक्ताले गाज्देकलाई थप सजाय नदिइने र खेल सकिएपछि कसैले पनि उक्त घटनाको चर्चा नगरेको बताए ।

एजेन्सी