प्रदेश २ मा प्रदेश सभा निर्वाचन सम्पन्न भएर प्रदेश सभाको पहिलो बैठक बसेको यही माघ २१ गते २ वर्ष पूरा भयो ।

दुई वर्षको अवधिमा प्रदेश सभाले स्थायी राजधानी तोक्ने र नामकरणको काम गर्न सकेको छैन, जुन उसको प्रमुख दायित्व हो ।

प्रदेश २ मा कुल १ सय ७ जना सांसद छन् ।

कानून निर्माण गर्ने प्रमुख थलो हुनुका साथै जनताबाट निर्वाचित जनप्रतिनिधिले जनताको आवाज उठाउने थलो पनि प्रदेश सभा नै हो ।

यस अवधिमा सांसदहरूले जनताको आवाज कति उठाए त ? प्रदेश सभा सचिवालयले उपलब्ध गराएको तथ्यांक हेर्ने हो भने ७ जना सांसदले त अहिलेसम्म एकपटक पनि नबोलेको देखिन्छ । प्रदेश सभाको तेस्रो अधिवेशन जारी रहँदा केही सांसदले भने पटक–पटक बोलेका छन् ।

प्रदेश सभा सचिवालयका सचिव रञ्जित कुमार यादवले उपलब्ध गराएको तथ्यांकअनुसार राजपा नेपालकी सांसद् अल्काकुमारी झा हालसम्म बोलेकी छैनन्, उनी समानुपातिकतर्फ महोत्तरीबाट प्रतिनिधित्व गर्छिन् ।

राजपा नेपालका महासचिव सुनिल रोहितकी श्रीमती समेत रहेकी झालाई राजपाका अध्यक्ष मण्डलका सदस्य अनिल कुमार झा प्यानलबाट सांसद बनाइएको हो ।

त्यसैगरी रौतहटका सांसद धनलाल ठोकरले पनि हालसम्म एकपटक पनि बोलेका छैनन् । ठोकर नेपाली कांग्रेसको टिकटमा रौतहटको संसदीय क्षेत्र नम्बर ४ (१) बाट प्रत्यक्ष निर्वाचित भएका थिए ।

त्यसैगरी समाजवादी पार्टीबाट निर्वाचित महोत्तरीका सांसद सरोजकुमार सिंहले पनि हालसम्म बोलेका छैनन् ।

महोत्तरीको संसदीय क्षेत्र नम्बर ४ (२) बाट प्रत्यक्ष निर्वाचित सिंह प्रदेश सरकारका राज्यमन्त्री पनि हुन्, उनी आन्तरिक मामिला तथा कानून राज्य मन्त्री छन् ।

त्यसैगरी समाजवादी पार्टीबाट निर्वाचित सांसद अभिशेख यादवले पनि बोलेका छैनन् ।

सप्तरीको संसदीय क्षेत्र नम्बर ४ (२) बाट निर्वाचित भएका यादव प्रतिनिधि सभा सदस्य तथा समाजवादी पार्टीकी उपाध्यक्ष रेणु यादवका छोरा समेत हुन् ।

यसैगरी समाजवादी पार्टीका शारदाशंकर कलवार र रागिनीदेवी वनरवाल तथा कांग्रेसका नागेन्द्रप्रसाद सिन्हाले समेत एकपटक पनि प्रदेश सभामा बोलेका छैनन् ।

जसले एकपटक मात्र बोले 

प्रदेश सभाका ११ जना सांसदहरूले हालसम्म १ पटक मात्र बोलेका छन् । महोत्तरी ३ (१)बाट निर्वाचित राजपाका सांसद अभिराम शर्माले १ पटक मात्र बोलेका छन् ।

उनी प्रदेश सरकारमा सामाजिक विकास राज्य मन्त्री समेत हुन् । त्यसैगरी समाजवादी पार्टीबाट पर्सा ३(१)मा निर्वाचित भएका सांसद अब्दुल रहिम अन्सारी, पर्साबाट प्रतिनिधित्व गर्ने नेपाली कांग्रेसका समानुपातिक सांसद आशिया देवी थरुनी पनि एकपटक मात्र बोलेका छन् । 

त्यसैगरी बाराबाट निर्वाचित समाजवादी पार्टीकी समानुपातिक सांसद उषाकुमारी यादवले पनि एकपटक मात्र बोलेकी छन् । उनी प्रदेश सरकारमा आर्थिक मामिला तथा योजना मन्त्री समेत छिन् । सर्लाहीको २(१)बाट प्रत्यक्ष निर्वाचित भएका राजपा सांसद गौरीनारायण साह तेली र  पर्सा १(१) बाट प्रत्यक्ष निर्वाचित भएका समाजवादी पार्टीका जनत अन्सारीले पनि एकपटक मात्र बोलेका छन् ।

सप्तरीबाट प्रतिनिधित्व गर्ने नेकपाकी समानुपातिक सांसद प्रमिला कुमारी यादव, सिरहाबाट प्रतिनिधित्व गर्ने नेकपाकी समानुपातिक सांसद फूलिया देवी सदाय, बाराबाट प्रतिनिधित्व गर्ने नेकपाका समानुपातिक संसद मोहम्मद समीर, रौतहटको २(२)बाट प्रतिनिधित्व गर्ने समाजवादी पार्टीका प्रत्यक्ष निर्वाचित सांसद रामकिशोरप्रसाद यादवले समेत एकपटक मात्र बोलेका छन् । 

त्यसैगरी सिरहाको ४ (२)बाट प्रत्यक्ष निर्वाचित भएका राजपा नेपालका सांसद सुरेशकुमार मण्डलले पनि एकपटक मात्र बोलेका छन् । मण्डल प्रदेश सरकारमा उद्योग, पर्यटन, वन तथा वातवरण राज्यमन्त्री समेत हुन् ।  

त्यसैगरी बाराको १(१)बाट प्रत्यक्ष निर्वाचित भएका नेकपाका सांसद त्रिलोकी प्रसादले समेत एकपटक मात्र प्रदेश सभामा बोलेका छन् ।

पर्साबाट प्रतिनिधित्व गर्ने राजपा नेपालकी अञ्जु कुमारी, महोत्तरीबाट प्रतिनिधित्व गर्ने समाजवादी पार्टीकी किरणकुमारी राय, सर्लाहीबाट प्रतिनिधित्व गर्ने राजपा नेपालकी निलमदेवी भूमिहारिनले २ पटक मात्र बोलेका छन् ।

सिराहाबाट प्रत्यक्ष निर्वाचित नेकपा सांसद मदनप्रसाद श्रीवास्तव, महोत्तरीबाट प्रतिनिधित्व गर्ने राजपा नेपालकी वविता कुमारी, सर्लाहीबाट प्रतिनिधित्व गर्ने नेपाली कांग्रेसकी श्यामपरी देवी, पर्साबाट प्रत्यक्ष निर्वाचित भएका नेपाली कांग्रेसका सांसद शंकरप्रसाद चौधरी, पर्साबाटै प्रत्यक्ष निर्वाचित भएका समाजवादी पार्टीका सांसद सिंघासन साह कलवारले समेत २ पटक मात्र बोलेका छन् ।

जसले बहसमा बढी भाग लिए 

प्रदेश सभामा केही यस्ता सांसद छन् जो हरेक दिनजसो बैठकमा कुनै न कुनै विषयमा बोलिरहेका हुन्छन् । शून्य समय होस् वा विशेष समय, विधेयकमाथिको छलफल होस् वा संशोधन नै हाल्ने कुरा, सबै विषयवस्तुमाथि गम्भीर रूपले अध्ययन गरेर रोचक तरिकाले बहस गर्ने सांसदहरू पनि छन् ।

ती सांसदहरूकै कारण प्रदेश सभाको बैठकमा हुने गरेको बहस रोचक त हुन्छ नै प्रतिपक्ष र सत्तापक्षबीच दोहोरी नै चल्ने गर्छ ।

हालसम्म सबैभन्दा बढी बोल्ने सांसदमध्ये धनुषाबाट प्रतिनिधित्व गर्ने नेपाली कांग्रेसका समानुपातिक सांसद शिवचन्द्र चौधरी छन् । उनले हालसम्म कुल ६५ पटक बोलिसकेका छन् ।

सक्रिय सहभागिताका कारण गत वर्ष प्रदेश सभाको वार्षिकोत्सवमा सभामुख सरोजकुमार यादवले उनलाई उत्कृष्ट सांसद भन्दै ५१ हजार रूपैयाँ नगदसहित सम्मानित गरेका थिए ।

उनीपछि धेरैपटक बोल्ने सांसदमा पर्छन्, नेकपाका सुन्दरबहादुर विश्वकर्मा । उनले हालसम्म कुल ४८ पटक बोलेका छन् ।

यसवर्ष दोस्रो वार्षिकोत्सव मनाउँदा सभामुख यादवले उनैलाई उत्कृष्ट सांसदको रूपमा ५१ हजार नगदसहित सम्मानित गरे । नेकपाका प्रमुख सचेतक समेत रहेका उनी बाराको ४ (१)बाट प्रत्यक्ष निर्वाचित सांसद हुन् ।

बढीपटक बोल्ने तेस्रो सांसद हुन्, धनुषाबाट प्रतिनिधित्व गर्ने समाजवादीका सांसद ज्ञानेन्द्रकुमार यादव । धनुषाको ४ (१)बाट निर्वाचित भएका यादव प्रदेश सरकारको आन्तरिक मामिला तथा कानून मन्त्री पनि हुन् ।

उनले हालसम्म कुल ३६ पटक बोलेका छन् । प्रदेश सरकारका प्रवक्ता समेत भएका कारण सांसदहरूले शून्य समय तथा विशेष समयमा उठाउने गरेका प्रश्नहरूको जवाफ प्रायःजसो उनले नै सरकारको तर्फबाट दिने गरेका छन् ।

मुख्यमन्त्री लालबाबु राउतले पनि कुल २३ पटक सदनमा बोलेका छन् । आर्थिक मामिला तथा योजना मन्त्री विजयकुमार यादवले १९ पटक, भूमि व्यवस्था, कृषि तथा सहकारी मन्त्री शैलेन्द्रप्रसाद साहले ३ पटक, सामाजिक विकास मन्त्री नबलकिशोर साह सुडीले १० पटक बोलेका छन् ।

त्यसैगरी भौतिक पूर्वाधार विकास मन्त्री जितेन्द्रप्रसाद सोनालले १५ पटक र उद्योग, पर्यटन, वन तथा वातावरण मन्त्री रामनरेश रायले ७ पटक मात्र बोलेका छन् ।

प्रमुख प्रतिपक्षी नेकपाका संसदीय दलका नेता सत्यनारायण मण्डलले १० पटक र अर्को प्रतिपक्षी दल नेपाली कांग्रेसका संसदीय दलका नेता राम सरोज यादवले २७ पटक बोलेका छन् ।   

हेर्नुहोस्, को कति बोले ?

नोट : सूचीमा बोलेको खण्ड खाली देखिएका सरोजकुमार यादव सभामुख र उपमाकुमारी देवी उपसभामुख हुन् । सभा सञ्चालन गर्नुपर्ने भएकाले बोल्ने सूचीमा उनीहरूको नाम हुँदैन ।