कोरोना महामारी क्षेत्रबाट उद्धार गरिने नेपाली राख्न ‘क्वारेन्टाइन’ तयार [भिडियो रिपोर्ट]


Advertisement

नेपाली सेना, नेपाल प्रहरी, सशस्त्र प्रहरी बल र स्वास्थ्य तथा जनसंख्या मन्त्रालयको सहकार्यमा सरकारले खरिपाटीमा रहेको विद्युत् प्राधिकरणको तालिम केन्द्रमा रहेको होस्टलमा नेपालीलाई राख्ने तयारी गरेको छ ।

सरकारी तयारीबीच स्थानीयले विरोध गरेका छन् । तालिम केन्द्र बस्तीको बीचमा भएकाले कोरोना संक्रमण फैलिने खतरा हुनसक्ने भन्दै स्थानीयले अरु नै सुरक्षित ठाउँमा राख्नुपर्ने माग गरेका छन् ।

चाँगुनारायण नगरपालिकाका राप्रपा नगर अध्यक्ष धनबहादुर तामाङले विद्युत् प्राधिकरणको तालिम केन्द्र आसपासका क्षेत्रमा बस्ती भएकाले कोरोना भाइरस सर्नसक्ने भन्दै अन्यत्र सुरक्षित स्थानमा क्वारेन्टाइन सार्न माग गरे ।

‘चाँगुनारायण नगरपालिकाको नगर सभाले खरिपाटीमा चीनबाट ल्याउन लागेका विद्यार्थी राख्न उपयुक्त ठाउँ नभएको र अन्यत्र सार्न सरकारलाई सुझाव समेत दिएको थियो,’ अध्यक्ष तामाङले लोकान्तरसँग भने ।

अध्यक्ष तामाङको चिन्तामा सहमत छिन् चाँगुनारायण नगरपालिका–४ खरिपाटीकी विमला तामाङ । उनले भनिन्, ‘सरकारले बस्तीबाट टाढा अन्यत्र स्थानमा क्वारेन्टाइन राख्नुपर्छ, यो ठाउँमा बस्ती छ, अरुलाई सर्छ कि भन्ने मनोत्रास छ ।’

चीनमा कोरोना भाइरसको त्रास बढेपछि नेपाली विद्यार्थीको आग्रह अनुसार सरकारले उद्धार गरेर ल्याउने तयारी गरेको छ । चीनमा कोरोना भाइरसबाट हालसम्म १ हजार बढी व्यक्तिको मृत्यु भएको र ४२ हजारभन्दा बढी संक्रमित भएको अन्तर्राष्ट्रिय सञ्चारमाध्यमले जनाएका छन् ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्