नेपाली कांग्रेसका सभापति शेरबहादुर देउवाले राष्ट्रिय सभाका सांसद एवं पार्टीका महाधिवेशन प्रतिनिधि दुर्गाप्रसाद उपाध्यायकोे निधनप्रति दुःख व्यक्त गरेका छन् ।

क्यान्सर रोगबाट पीडित सांसद उपाध्यायको उपचारका क्रममा शुक्रवार निधन भएको हो । 

सभापति देउवाले शुक्रवार शोक वक्तव्यमार्फत उनको आत्माको चीर शान्तिको कामना गर्दै शोक सन्तप्त परिवारजनप्रति समवेदना प्रकट गरे । सांसद उपाध्यायको निधनबाट पार्टीलाई अपूरणीय क्षति पुगेको बताउँदै सभापति देउवाले पार्टी र आफ्नो व्यक्तिगततर्फबाट श्रद्धाञ्जलि अर्पण गरेका छन् ।

उनले सांसद उपाध्यायको निधनको खबरले दुखित र स्तब्ध भएको उल्लेख गर्दै उपाध्यायले नेपालको लोकतान्त्रिक आन्दोलन र पार्टीको संगठनमा सक्रिय योगदान पुर्‍याएको बताएका छन् ।

विक्रम संवत् २०२६ सालमा जन्मेका उपाध्याय विक्रम संवत् २०४६ सालको जनआन्दोलनदेखि कांग्रेसमा सक्रिय रहँदै आएका थिए । विक्रम संवत् २०५४ सालको स्थानीय निर्वाचनमा रुपन्देहीको साविक मधुवनी गाविसमा उनी उपाध्यक्ष पदमा निर्वाचित भएका थिए । कांग्रेसको बाह्रौं र तेह्रौं महाधिवेशनमा उपाध्याय २ कार्यकाल क्षेत्रीय सभापतिसमेत थिए ।

विक्रम संवत् २०७४ सालमा उनी काँग्रेसका तर्फबाट प्रदेश नम्बर ५ बाट राष्ट्रिय सभाको सदस्यमा निर्वाचित भएका थिए ।