शहीद स्मारक लीग : उपाधिका लागि आर्मी र मच्छिन्द्र भिड्दै

शहीद स्मारक ‘ए’ डिभिजन लीगको उपाधिका लागि नेपाली सेनाको त्रिभुवन आर्मी क्लब र मच्छिन्द्र क्लब भिड्दै छन् ।

उपाधिका लागि दुवै टोलीबीच अहिले दशरथ रंगशालामा खेल हुँदैछ । दुवै टोली पहिलोपटक उपाधि जित्ने होडमा छन् । 


Advertisement

आर्मी लीग तालिकाको शीर्षस्थानमा छ । मच्छिन्द्र दोस्रो स्थानमा छ । आर्मीले १२ खेलमध्ये ९ खेलमा जीत, २ खेलमा हार तथा १ खेलमा बराबरी खेल्दै २९ अंक जोडेको छ ।

मच्छिन्द्रले हालसम्म खेलेका १२ खेलमध्ये ९ खेलमा जीत, २ खेलमा हार तथा १ खेलमा बराबरीका साथ २८ अंक जोडेको छ । अघिल्लो संस्करणमा पुछारबाट दोस्रो स्थानमा रहेका कारण मच्छिन्द्रको १ अंक घटाइएको हो । 


Advertisement

आर्मीलाई उपाधि जित्न शनिवार मच्छिन्द्रसित बराबरी खेले पुग्छ भने मच्छिन्द्रलाई उपाधि चुम्न शनिवारको खेल अनिवार्य जित्नुपर्ने अवस्था छ । मच्छिन्द्र उपाधि होडमा पहिलोपटक सामेल भएको हो ।

आर्मीले विक्रम संवत् २०६३ सालको लीगमा नेपाल पुलिस क्लबसित पराजित भई उपविजेतामै चित्त बुझाउन बाध्य भएको थियो । 

आर्मीका प्रशिक्षक नवीन न्यौपाने र यता मच्छिन्द्रका प्रशिक्षक प्रवेश कटवालले उपाधि आ–आफ्नो टोलीले जित्ने दाबी गरेका छन् । उपाधिका लागि मच्छिन्द्रभन्दा आर्मी सहज अवस्थामा छ । मच्छिन्द्र भने दबाबमा खेल्नेछ ।

आर्मीका कप्तान भरत खवास र मच्छिन्द्रका कप्तान विराज महर्जनले पनि प्रशिक्षकले जस्तै उपाधिमाथि आफ्नो टोलीको कब्जा रहने दाबी गरेका छन् । शहीद स्मारक लीग गत मंसिर २७ गतेदेखि शुरू भएको हो ।

कमेन्ट गर्नुहोस्