२ नम्बर प्रदेशको स्थायी राजधानी जनकपुरधाम नै हुने लगभग सुनिश्चित भएपछि प्रशासनिक अड्डाको रुपमा नामकरण गरिएको ‘मधेश भवन’लाई प्रदेश सरकारले सिँगार्दैछ ।

मधेश भवनसम्म जाने सडक जीर्ण र पूर्ण व्यवस्थित समेत नभएकाले आकर्षक सडक सहितका पूर्वाधार निर्माण प्रक्रिया थालिएको भौतिक पूर्वाधार तथा विकास मन्त्री जितेन्द्र सोनलले बताए ।

काठमाडौंको सिंहदरबार जस्तै मधेश भवनमा पनि आकर्षक सडकसहित सौन्दर्यीकरण गर्नका लागि प्रक्रिया अगाडि बढाइएको उनले बताए । ‘हालसम्म जनकपुरधाम प्रदेशको अस्थायी राजधानी नै छ, त्यसैले जे जस्तो पूर्वाधार थियो, त्यसैमा प्रदेश सरकारको मन्त्रालयदेखि निवासहरू राखियो,’ मन्त्री सोनलले भने, ‘तर सभामुख सरोजकुमार यादवको अध्यक्षतामा रहेको संसदीय समितिमा स्थायी राजधानी जनकपुरधाम नै रहने सर्वसम्मति भइसकेकाले मधेश भवनलाई आकर्षक बनाउन लागेका छौं ।’

सेवाग्राहीदेखि पर्यटक समेत मधेश भवनमा आउने हुँदा प्रदेश सरकारको प्रशासनिक केन्द्र आकर्षक देखिओस् र त्यसकारण पनि प्रदेशको पर्यटन प्रबद्र्धन हुन सक्ने आशयका साथ निर्माणको काम अगाडि बढाइएको उनले बताए ।

पैदलपथ सहितको सडक, फोहोरा सहितको प्रवेशद्वार बनाइँदै

मधेश भवनभित्र रहेका सम्पूर्ण सडकलाई मर्मत गर्दै व्यवस्थित पैदलपथ सहितको आकर्षक सडक निर्माणका लागि मन्त्रालयले ९ करोड रुपैयाँ विनियोजन गरिसकेको छ । भौतिक पूर्वाधार विकास मन्त्रालयका शहरी विकास तथा भवन महाशाखाका इन्जिनीयर विनोदकुमार यादवले सडक निर्माणका लागि १५ दिन अघि टेन्डर भइसकेको बताए ।

‘स्फाल्ट कंक्रिट मोडेलको व्यवस्थित फूटपाथसहित ७ मिटर सडक निर्माणका लागि टेन्डर निकालेका छौं,’ यादवले लोकान्तरसँग भने, ‘त्यसैगरी मधेश भवन प्रवेश गर्ने ३ वटा गेटमा भव्य र आकर्षक प्रवेशद्वार समेत बनाउन लागिएको छ ।’ ६० लाख रुपैयाँको बजेट रहेको प्रवेशद्वार निर्माणका लागि निर्माण व्यवसायीले ठेक्का रकमभन्दा धेरै कम रकम ३२ लाख रुपैयाँमा ३ वटा प्रवेशद्वार बनाउन सकार गरेका छन् । प्रवेशद्वारसहित एउटा मूल प्रवेशद्वारमा पानीको फोहोरा निर्माणका लागि आशयको सूचना जारी गरिएको उनले बताए ।