नेपाल कम्युनिष्ट पार्टी (नेकपा)का अध्यक्ष एवं पूर्व प्रधानमन्त्री पुष्पकमल दाहाल 'प्रचण्ड'ले कर्णालीवासीको विकासका लागि विशेष जोड दिने आश्वासन दिएका छन् ।

नेकपा कर्णाली प्रदेशका अगुवा कार्यकर्ता भेलामा सहभागि भएका प्रचण्डले कर्णालीलाई विषेश ध्यान दिएर विषेश प्याकेज तयार गर्ने बताए ।

‘कर्णालीको विकास नभएसम्म नेपाल समृद्ध बन्न सक्दैन । हामी यहाँको विकासका लागि सरकारसँग पर्याप्त कुराकानी गर्छौं, योजना चयन गर्छौं,' उनले भने, ‘सोही अनुसार बजेट तथा कार्यक्रम तयार पार्नेमा विश्वस्त हुनुस । नेकपाले कर्णालीको विकासका लागि विषेश पहल गर्नेछ यसमा ढुक्क हुनुहोस ।’

कर्णाली केही महत्वपूर्ण परियोजना चिनियाँ राष्ट्रपतिको नेपाल भ्रमणका बेलामा पनि विषेश जोड दिएर दुई देशबीचको समझदारीमा राखिएको स्मरण गर्दै प्रचण्डले कर्णालीको भविष्यसँग जोडिएका परियोजना सम्पन्न गरिने बताए ।

‘सुर्खेत हिल्सा सडकलाई अगाडी बढाउन पहल गर्छु,' उनले भने, ‘भेरी करिडोर र सुर्खेत विमानस्थलको स्त्तरउन्नती गर्ने बारेमा पनि संघीय सरकारले पहल गर्छ । कर्णालीमा हाइड्रो परियोजना निर्माणका लागि पनि सरकारले आवश्यक कदम चाल्नेछ ।’

पार्टीको कर्णाली प्रदेशको भेला तथा प्रशिक्षण कार्यक्रमका लागि वरिष्ठ नेता तथा पूर्वप्रधानमन्त्री माधव कुमार नेपाल, महासचिव विष्णु पौडेलका साथ मंगलबार सुर्खेत आएका अध्यक्ष प्रचण्डले सुर्खेत विमानस्थलमा पत्रकारसँग कुरा गर्दै कर्णालीको विकासका लागि संघीय सरकारले विषेश जोड दिने बताएका हुन् ।

‘पार्टी र संसदीय दलका साथीहरुसँगको छलफलमा कर्णाली प्रदेशको अवस्था, विकासको आवश्यक्ता र समस्याका बारेमा कुरा भएको छ’, उनले भने ‘कर्णालीको कुन क्षेत्रमा ध्यान दिनुपर्छ भन्ने जानकारी भएको छ, त्यसका पार्टी र सरकारले विषेश ध्यान दिनेछ ।’

संघीय सरकारले कर्मचारीको छाता ऐन ‘निजामती कर्मचारी सेवा ऐन’ बनाउन नसक्दा प्रदेशमा कर्मचारीको अभाव भएको उनको भनाइ थियो । उनले प्रदेश निजामती ऐन बनाएर प्रदेश आफैले कर्मचारी भर्ना गर्ने अवस्था नहुँदासम्म दिर्घकालीन रुपमा कर्मचारी समस्या समाधान नहुने बताए ।

अर्को एक प्रसंगमा कर्णाली प्रदेशमा अहिले भर्खरै बाँके र बर्दिया मिसाउने भनेर आफूले नभनेको भन्दै प्रचण्डले प्रदेशको भौगोलिक सिमा सधै अहिलेको जस्तै रहने संविधानमा ग्यारेण्टी नभएको बताए ।

‘बाँके बर्दिया लाई कर्णालीका मिसाउने मैले बहस नै छेडेको त होइन्, यसअघि प्रसंगवश कुरा आएको हो,’ उनले भने, 'प्रदेशको भौगलिक संरचना भू-बनावट सधै त्यस्तै हुन्छन भन्ने कुरा संविधानले ग्यारेण्टी गरेको छैन ।'

कर्णालीमा प्रचण्ड लगायतका नेताहरुले कर्णाली प्रदेशस्तरीय पार्टीको भेलामा प्रशिक्षण दिनुका साथै कर्णाली प्रदेशको प्रदेश सभा सदस्य तथा कर्णाली प्रदेशका पार्टी केन्द्रिय सदस्यहरुसँग छलफलसमेत गरेका छन् ।