आइतवार अपराह्न २ बजे प्रधानमन्त्री केपी शर्मा ओली आफ्नो ६९ औँ जन्मोत्सव मनाउन आठराई गाउँपालिका वडा नं ४ इवास्थित आफ्नो जन्मघरमा पुगे ।

उनलाई सङ्घीय सांसद भवानीप्रसाद खापुङ, प्रदेशसभा सदस्य लक्ष्मण तिवारी र तेजमान कङ्दम्वा, गाउँपालिका अध्यक्ष मानबहादुर लिम्बू र स्थानीयवासीले स्वागत गरेका थिए ।    

प्रधानमन्त्री ओली अवतरण हुनै लाग्दा हेलिकप्टरले उडाएको धूलोले सर्वसाधारणलाई व्हात्तै छोप्यो ।

आइतवार पाँचथरको यासोकमा तमोर लिफ्ट खानेपानी आयोजना र विद्युतको केन्द्रीय प्रसारण लाइन उद्घाटन गरेपछि प्रधानमन्त्री ओली आफ्नो जन्मघरतिर लागेका हुन् ।

जन्मदिनका दिन ओली आउने भएपछि त्यहाँको स्थानीय सरकारले ३ महिनाअघि देखि नै तयारी थालेको थियो । हेलिप्याड बनाउनेदेखि लिएर अन्य आवश्यक कुराहरू पहिल्यैदेखि व्यवस्थापन गरिएको थियो ।

प्रधानमन्त्री पुगेपछि उनको स्वागतमा लिम्बू समुदायको च्याब्रुङ नाच, सङ्गिनी नाच तथा विभिन्न झाँकी प्रदर्शन गरिएको थियो ।    

ओलीका साथमा उनकी धर्मपत्नी राधिका शाक्य, पिता मोहनप्रसाद ओली, नेकपा संसदीय दलका उपनेता सुवास नेम्वाङ, प्रदेश नं १ का मुख्यमन्त्री शेरधन राई, स्वास्थ्य तथा जनसङ्ख्यामन्त्री भानुभक्त ढकाल, खानेपानीमन्त्री विना मगर, सङ्घीय सांसद विजय सुब्बा, गणेश विमलीलगायत थिए ।    

तस्वीर सौजन्य - गोरखापत्र