सरकारको निगरानी गर्दै सत्तारूढ नेकपा, विशेष टोली खटाउने

शेरबहादुर थापा
शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

नेपाल कम्युनिष्ट पार्टी नेकपा कर्णाली प्रदेश कमिटीले ७९ वटा स्थानीय सरकार र प्रदेश सरकारको काम कारवाहीको प्रभावकारी र निगरानी गर्न विशेष टोली खटाउने भएको छ ।

नेकपा कर्णाली प्रदेशको फागुन ६ र ७ गते बसेको प्रदेशस्तरीय अगुवा कार्यकर्ता भेला तथा प्रदेश कमिटीको तेस्रो पूर्ण बैठकले गरेका निर्णय पत्रकार सम्मेलनमार्फत जानकारी गराउँदै अध्यक्ष गोरख बोगटीले प्रदेश, जिल्ला, स्थानीय तथा टोलमा पनि यस्ता टोली खटाइने जानकारी दिए ।


Advertisement

‘जनताका अपेक्षाअनुसार काम नभएको गुनासो सर्वत्र आइरहेको छ । विगतमा पार्टीका सबै कमिटी नबनेका कारण निगरानी गर्न र सरकारलाई निर्देशन दिन समस्या भएको थियो,' अध्यक्ष बोगटीले भने, ‘अब समस्या छैन । सबै तहका कमिटी गठन भइसकेका छन् । ती सबैले सरकारका काम कारवाहीलाई विगतको भन्दा थप प्रभावकारी बनाउने गरी आवश्यक निर्देशन दिनेछन् । गलत कसैले गरेको अवस्थामा पार्टीलाई जानकारी दिनेछन् । पार्टीले अध्ययन गर्ने र गलत देखिएको खण्डमा छानबिन गरी दोषीलाई कारवाही गर्ने गरी हामी अघि बढेका छौं ।’

उनले भ्रष्टाचारविरुद्ध शून्य सहनशीलता कायम राख्न पार्टीले सबै सरकारलाई निर्देशन दिइसकेको बताए । उनले सरकार पार्टीकै नेतृत्वमा चल्नुपर्ने बताए ।


Advertisement

‘सरकारलाई पार्टीले चलाइरहेको छ की पार्टीले सरकार चलाइरहेको छ भन्ने विगतमा द्धिविधा थियो तर अब पार्टीले नै सरकार चलाइरहेको स्पष्ट भएको छ । यसको प्रभावकारिता केही दिनमा नै देख्नुहुनेछ,' उनले भने, ‘विगतका कमीकमजोरी नदोहोर्याउन र प्रभावकारी भूमिका निर्वाह गर्न सबै सरकारलाई आवश्यक निर्देशन दिइसकेका छौं ।’

उनले प्रदेश सरकार परिवर्तन हुने भन्ने हल्ला निराधार रहेको बताए । ‘अहिले हामीले सरकारलाई नजिकबाट थप सहयोग गर्ने नीति अख्तियार गरेका छौं । सरकारलाई जनपक्षीय काम गर्न सहयोग गर्ने जानकारी दिएका छौं । सुझाव दिइरहेका छौं,' उनले भने ।

अहिले नै सरकार परिवर्तन भन्ने कुरा नभएको उनले बताए । 'सरकारले जनअपेक्षा अनुरुप काम गर्न नसकेको खण्डमा सरकार परिवर्तनको विकल्प पनि रहन्छ र अन्य विकल्पमा पनि जान सकिन्छ,' उनले भने ।’

प्रदेश सरकारले २ वर्षमा कानून निर्माण गरेको, संरचना निर्माण गरेको पार्टीलाई ब्रिफिङ गरेको उनको भनाइ छ । पार्टी प्रदेश सचिव मायाप्रसाद शर्माले पार्टीलाई चलायमान बनाउन पार्टी एकता सुदृढीकरण तथा जनसम्बन्ध बिस्तार अभियान शुरू गर्ने निर्णय भएको बताए ।

उनका अनुसार फागुन महिनाभित्रै कर्णाली प्रदेशका दश वटै जिल्ला कमिटीको बैठक सम्पन्न हुनेछन् ।

२०७७ सालको वैशाख दोस्रो हप्तासम्म जिल्लामा विभिन्न तह, वडा, टोलसम्म भेला, प्रशिक्षणलगायतका कामहरू सम्पन्न गर्ने निर्णय भएको बताए । यसका साथै आगामी केही दिनभित्र पार्टीका ३० वटा विभाग गठन गरिने र स्थानीय तहको इन्चार्ज र सह इन्चार्ज भई भूगोलमा जिम्मेवारी पाएका बाहेकका सबै सदस्यलाई उचित जिम्मेवारी दिइने सचिव शर्माको भनाई थियो ।

शेरबहादुर थापा
शेरबहादुर थापा

लेखकबाट थप...

कमेन्ट गर्नुहोस्