प्रहरी नायब महानिरीक्षक (डीआईजी) विश्वराज पोखरेलले प्रहरी जवान र प्रहरी अधिकृतले एउटै मेसमा खाना खाँदा अनुशासन कायम हुने बताएका छन् ।

उपत्यकामा सञ्चालित प्रहरी संयुक्त मेस सुधार अभियानअन्तर्गत महानगरीय ट्राफिक प्रहरी कार्यलयका लागि बन्न लागेको नयाँ भवनको बुधवार बिहान शिलान्यास गर्दै डीआईजी पोखरेलले प्रहरी अधिकृत र जवानहरूले एउटै मेसमा खाना खाँदा सद्भाव बढ्नुका साथै अनुशान पनि कायम हुने बताएका हुन् ।

‘संगठनभित्रबाटै अधिकृत र जवानले एकै ठाउँमा खाना खान अप्ठ्यारो पर्ने र यसले मर्यादा कायम नहुने भन्दै आलोचना गर्दै आउनुभएको छ, तर यसले गर्दा अधिकृत र जवानहरूमा सद्भाव कायम हुने र अनुशासन कायम हुन्छ,’ पोखरेलले भने ।

डीआईजी पोखरेले प्रहरीमा आउने हरेक किसिमका नागरिकहरूको भावनाको कदर गर्न प्रहरी सक्षम हुनुपर्ने र राज्यको अभिन्न अंग प्रहरी भएको बताउँदै उच्च मनोबलका साथ कानून कार्यान्वयनमा कठोर बन्न निर्देशन समेत दिए । 

जनता र प्रहरी मिलेरै समाजका सबैखाले अपराध र विकृति/विसंगति अन्त्य गर्न सकिने उनको भनाइ थियो । 

ठूलो संख्यामा  रहेका जवान र हवल्दारसहित चौबीसै घण्टा ड्यूउटीमा खटिने प्रहरी कर्मचारीहरूलाई गुणस्तरीय खाना, सफा मेस तथा ब्यारेक भवन लगायतका सेवासुविधा उपलब्ध गराए मात्र प्रहरीबाट हुने सेवाप्रवाह अझ बढी स्तरीय र प्रभावकारी हुने अपेक्षा रहेको डीआईजी पोखरेलले बताए  ।

वाशिङ मेसिन हस्तान्तरण

प्रहरीलाई सक्षम र आधूनिकीकरण गर्न, प्रहरीलाई स्मार्ट बनाउन र काममा छिटोछरितो बनाउनका लागि महानगरीय प्रहरी कार्यालयले महानगरीय ट्राफिक महाशाखालाई लूगा धुने वाशिङ मेसिन हस्तान्तरण गरेको छ ।

हरेक दिन धूलोधूवाँले गर्दा ट्राफिक प्रहरीका कपडाहरू छिट्टै फोहोर हुने र यसलाई हातले धुँदा धेरै समय जाने भएकाले छिटोछरितो र प्रविधियुक्त प्रहरी बनाउनका लागि पहिलो चरणमा एउटा वाशिङ मेसिन हस्तान्तरण गरिएको डीआईजी पोखरेलले बताए ।

वाशिङ मेसिनले गर्दा ट्राफिक प्रहरीको काजमा सहज हुने भएकाले सहयोगका लागि महानगरीय प्रहरी कार्यलयलाई ट्राफिक महाशाखाका प्रमुख वरिष्ठ प्रहरी उपरीक्षक भीमदत्त ढकालले धन्यवाद दिए ।