राष्ट्रिय सभाका सांसदले सार्वजनिक जग्गा केही मानिसलाई फाइदा हुने गरी दिने निर्णय खारेज गर्न सरकारसँग माग गरेका छन् ।

सभाको मंगलवारको बैठकको शून्य समयमा सांसद अनिता देवकोटाले घोराही उपमहानगरपालिकामा रहेको सार्वजनिक जग्गा नियम विपरीत नेपाल कम्युनिस्ट पार्टी (नेकपा) का कार्यकर्तालाई लिजमा दिन लागिएकाले खारेज गर्न माग गरिन् ।

सार्वजनिक जग्गा प्राकृतिक विपत्तिका लागि राखिनुपर्नेमा केही व्यक्तिको फाइदाका लागि बाँडिदापछि आइपर्ने समस्याबारे बेलैमा सचेत हुन उनले आह्वान गरिन् ।

अर्का सांसद इन्दु कडरियाले नेपालको वनजंगलमा पाइने जडीबुटी बाहिरिने तर औषधि महंगो भएर भित्रिने गरेकाले देशमै त्यसलाई उपयोग गर्ने विषयमा भएको कामबारे जानकारी दिन सरकारसँग माग गरिन् ।

सांसद कविता बोगटीले हुम्लाको ताक्लाकोटमा १५० जना बेवारिसे बसिरहेको बताउँदै १ जना मात्र सदरमुकाम आएकाले बाँकीलाई पनि जाँच गरी ल्याउने व्यवस्था मिलाइयोस् भनी माग गरिन् ।

सांसद कोमल वलीले २ वर्षको कार्यकाल पूरा गरी बिदाइ हुने सांसदलाई कविता वाचन गरी बिदाइ गरिन् । सांसद खिमकुमार विकले विभेदलाई कानूनले निषेध गरेपनि छुवाछूत बढिरहेको बताउँदै छुवाछूत मुक्त राष्ट्र घोषणा गर्न प्रगतिशील सरकारले काम गर्नुपर्ने बताए ।

सांसदहरू उदया शर्मा पौडेल, ठगेन्द्रप्रकाश पुरी र तारादेवी भट्टले बिदाइ हुन लागेका १९ जना सांसदको सुखद एवं सफल जीवनको कामना गरेका छन् ।