कोरोना भाइरसको त्राससँगै काठमाडौंको प्रमुख पर्यटकीय क्षेत्र ठमेल सुनसान बन्दै गइरहेको छ ।

चिनियाँ पर्यटकलाई लक्षित गरेर सञ्चालनमा रहेका होटल तथा व्यवसाय करीब बन्द हुने स्थितिमा पुगिसकेका छन् भने अन्य क्षेत्रमा पनि पर्यटकको संख्या घटेको छ ।

विदेशी पर्यटकको आगमनले भरिभराउ हुने ठमेलका गल्लीमा यतिबेला फाट्टफुट्ट रुपमा मात्रै पर्यटक देखिएका छन् । नेपाली मौलिकता बोकेका सामग्री बेच्ने पसलमा ग्राहकहरू प्रवेश गरेको देखिँदैन ।

व्यवसायीले कोरोनाको आतंकसँगै व्यवसाय अप्ठ्यारोमा पर्दै गएको बताएका छन् । थ्री स्टार ठमेल इको रिसोर्टका म्यानेजर विकास लम्सालले व्यवसायमा ४० प्रतिशतले गिरावट आएको बताए ।

‘इको रिसोर्ट युरोपियन पर्यटकलाई लक्षित गरी सञ्चालन गरिएको हो, अहिले त्यस क्षेत्रमा समेत कोरोना भाइरसको संक्रमण देखिएपछि आउने पर्यटकको संख्या ह्वात्तै घटेको छ,’ म्यानेजर लम्सालले भने । म्यानेजर लम्सालका अनुसार हाल इको रिसोर्टमा ९७ वटा कोठा भएकोमध्ये जम्मा ४० प्रतिशत मात्रै बुकिङ भएका छन् ।

चिनियाँ पर्यटकलाई लक्षित गरेर सञ्चालन गरिएको ठमेलको लासा गेस्ट हाउस चिनियाँ व्यवसायी पर्यटक आएर बस्ने ठाउँ हो । गेस्ट हाउस अहिले सुनसान जस्तै बनेको छ ।

‘यहाँ ८९ कोठा छन्, अहिले जम्मा १० वटा कोठा मात्रै बूक भएकोे अवस्था छ, अफ सिजन जस्तै भएको छ,’ गेस्ट हाउसका म्यानेजर दिपेश पाण्डेले लोकान्तरसँग भने, ‘गेस्ट हाउस सञ्चालन गरेको ५ वर्षको अवधिमा पहिलोपटक यस्तो अनुभव भएको छ ।’

पर्यटकलाई लक्षित गरेर ठमेलमा सञ्चालित टूर एण्ड ट्राभल एजेन्सीका कार्यालय पनि सुनसान देखिएका छन् । चीनमा कोरोना देखिएसँगै नेपाल घुम्न आउने पर्यटकको संख्या घटेको ट्राभल व्यवसायीको गुनासो छ ।

टप अफ द वर्ल्ड एड्भेन्चर प्रालिमा विगतको तुलनामा २० प्रतिशत मात्रै काम भएको सञ्चालक जनार्दन नेपालले बताए । ‘ट्रेकिङ वा ट्राभलको क्रममा पर्यटकहरूले आफ्नो यात्रा सुरक्षित होस् भन्ने चाहन्छन्, अहिले कोरोना ग्लोबल इस्यू भएको हुँदा ट्राभल क्यान्सिल गर्ने क्रम बढिरहेको छ,’ नेपालले लोकान्तरसँग भने । 

सिजनका हिसाबले यतिबेला पर्यटकको आगमन ‘ओभर फ्लो’ हुनुपर्ने भएपनि त्यसो नभएको बताउँदै ट्राभल व्यवसायी नेपालले भने, ‘अहिलेसम्मको स्थितिमा घरभाडा तिर्न र पुरानो कारोबारको हिसाबले कर्मचारीलाई तलब त सकिन्छ तर अब बिस्तारै नयाँ रिजर्भेसन नहुँदा पर्यटन व्यवसायलाई निकै गाह्रो हुने देखिन्छ ।’