गोलको खडेरी तोड्दै खेलको उत्तरार्धमा आएर डिफेन्डिङ च्याम्पियन रुस्लान थ्री स्टार क्लब १८ औं आहारारा गोल्डकप फूटबल प्रतियोगिताको सेमिफाइनल प्रवेश गरेको छ । 

नेपालमै पहिलो पटक पोखरा रंगशालामा फूटबल खेल्न आएको पाहुना टोली भारतको गान्तोक सिटी फूटबल क्लबलाई ३–० गोलअन्तरले पराजित गर्दै थ्रीस्टारले विजयी यात्रा शुरू गरेको हो । 

पोखरा रंगशालामा सोमवार भएको तेस्रो क्वाटरफाइनलमा थ्रीस्टारका युवा खेलाडी सुशान श्रेष्ठले २ र सन्जोक राईले १ गोलको योगदान दिएका हुन् । 

सञ्जोक श्रेष्ठले खेलको ७९ औं मिनेटमा मैदानको मध्यभागबाट निशान खड्काको पास सदुपयोग गर्दै एक्लै अग्रता बढाउँदै विपक्षी पोस्टको जाली चुमाएका हुन् । कीपर निम्डुप लेप्चालाई बिट गर्दै गरेको प्रहारबाट उनले टीमलाई अग्रता दिलाए ।

थ्रीस्टारले अग्रता लिएपछि लगातार उसको पक्षमा थप २ गोल निस्कियो । १४ मिनेटभित्रै उसले ३ गोल गर्न सक्यो । दोस्रो हाफको इञ्जुरी टाइममा अर्का युवा खेलाडी सुशान श्रेष्ठले २ गोल थपे । थप ३ मिनेटको दोस्रो मिनेटमा सुशानले २ डिफेन्डर छलाउँदै डी एरियाबाट गोल गरेका हुन् । तेस्रो मिनेटमा उनले थप अर्को गोल गरे । प्रतियोगितामा सुशान नै म्यान अफ दी म्याच घोषित भए । 

आहारारामा पाँचौ पटकको विजेता थ्रीस्टारले अब फाइनल प्रवेशका लागि पहिलो सेमिफाइनलमा नेपाल पुलिस क्लबसँग प्रतिस्पर्धा गर्नेछ ।

खेलको आठौं मिनेटमा मिक्छेन तामाङको कर्नरमा अनन्त तामाङको हेड बल बाहिरिँदा थ्रीस्टार अग्रता लिनबाट चुकेको थियो । १९  मिनेटमा निशान खड्काको ३२ यार्ड टाढाको फ्रिकिक प्रहार पोस्ट नजिकैबाट बाहिरियो । २१ मिनेटमा मिक्छेनको फ्रिकिकमा कप्तान विक्रम लामाको हेड बाहिरिँदा थ्रीस्टारले खेलमा अग्रता लिनबाट पुनः चुक्यो । लगत्तै मिक्छेन लामाको कर्नरमा अनन्त तामाङको हेडर बाहिरियो । खेलको ८५ औ मिनेटमा गान्तोकले खेल बराबरी गर्ने अवसर चुकाएको थियो । छिरिङ लेन्डुप भुटियाले गरेको लङ प्रहार विपक्षी किपरले उत्कृष्ट बचाउ गरेका हुन् ।

जारी सिजनमा थ्रीस्टारले २ वटा खेलमा उपविजेतामै चित्त बुझाएको छ । पोखरामा भने उसले उपाधि रक्षा गर्ने दाउमा रहेको प्रशिक्षक मेघराज केसीले बताए । उनले विपक्षी खेल स्टामिना बुझ्ने क्रममा गोल निकाल्न कठिन बनेको प्रतिक्रिया दिए ।

विपक्षीको खेल कौशललाई पनि उनले प्रशंसा गरे । ‘गोल चाहेकै अवस्थामा कहाँ हुन्छ र ? अन्तिम मिनेटसम्म कुर्नु नै फुटबलको विशेषता हो,’ उनले भने ।

आफ्नो टीममा युवा खेलाडीको बाहुल्यता रहेको उल्लेख गर्दै उनले दर्शकले ठूलो आशा गर्न नमिल्ने बताए । थ्रीस्टारका कीपर विक्रम लामा, अनन्त तामाङ र मिक्छेन तामाङ मात्र पुराना खेलाडी हुन् । 

पाहुना टोलीका प्रशिक्षक मायाल डोक लेप्चाले अफ्साइड भएको अवस्थामा भएको गोललाई रेफ्री प्रकाशनाथ श्रेष्ठले मान्यता दिएको भन्दै असन्तुष्टि व्यक्त गरे । 

मंगलवार हुने चौथो क्वाटरफाइनलमा संकटा क्लब र साविक उपविजेता त्रिभुवन आर्मी क्लबबीच प्रतिस्पर्धा हुने आयोजक सहारा क्लब पोखराले जनाएको छ । 

यसअघि नेपाल पुलिस क्लब, मनाङ मस्र्याङ्दी क्लब प्रतियोगिताको अन्तिम चारमा आफूलाई सुरक्षित पारिसकेका छन् । प्रतियोगिताको फाइनल १ चैतमा हुनेछ ।