भारतका प्रधानमन्त्री नरेन्द्र मोदीले नेपालका समकक्षी केपी शर्मा ओलीलाई विशेष बधाइ दिएका छन् । भर्खर शल्यक्रियाबाट आएको भन्दै मोदीले आइतवार साँझ सार्क सदस्य राष्ट्रका सरकारप्रमुखहरूको भिडियो कन्फरेन्समा प्रधानमन्त्री ओलीलाई विशेष बधाइ दिएका हुन् ।

'छोटो समयमा भएपनि यो विशेष अन्तरक्रियामा जुट्नुभएकोमा सबैलाई धन्यवाद दिन चाहन्छु,' मोदीले आफ्नो वक्तव्यको शुरुमै भनेका छन्, 'हाम्रो मित्र नेपालका प्रधानमन्त्री ओलीलाई विशेष धन्यवाद दिन चाहन्छु, उहाँले मिर्गौला प्रत्यारोपणको शल्यक्रिया लगत्तै यहाँ जोडिन आउनुभयो ।'

मोदीले सार्क क्षेत्रमा जम्मा १ सय ५० कोरोना संक्रमणको केस भएको भन्दै सबै देश सतर्क हुनुपर्ने बताए ।

उनले त्रासमा रहनु भन्दा तयारी थाल्नु ठूलो कुरा भएको बताए । 'तयार रहनुहोस्, तर नडराउनुहोस् यो हाम्रो मार्गदर्शक मन्त्र हो,' मोदीले भने ।

विश्वव्यापी महामारीका रूपमा फैलिएको कोरोना भनिने कोभिड– १९ को सङ्क्रमण फैलिन नदिन दक्षिण एसियाली क्षेत्रीय सहयोग संगठन (सार्क) सदस्य मुलुकका सरकार प्रमुखबीच आइतवार साँझ भिडियो कन्फरेन्स शुरू भएको छ ।

भारतका प्रधानमन्त्री नरेन्द्र मोदीले कोभिड–१९ को संक्रमण फैलिन नदिन सार्क राष्ट्रका नेतृत्वले सुदृढ रणनीति अवलम्बन गर्नुपर्ने औंल्याई गत फागुन ३० गते गरेको ट्वीटको स्वागत गर्दै नेपालका प्रधानमन्त्री एवं सार्कका वर्तमान अध्यक्ष केपी शर्मा ओलीसहित सदस्य मुलुकका नेताहरू कन्फरेन्समा सहभागी भएका हुन् ।